بۆ هاوارهاتنا تیما خوه زاخۆ هه‌شت یاریزان زێده‌كرین
ئه‌ڤرۆ، عه‌لی حاجی:
د داخویانیه‌كێدا سه‌رپه‌رشتێ تیما ته‌پا پێی یا یانا زاخۆ ئه‌وا پشكدار د خولا پلا نایابا كوردستانێ دا دیاركر ئه‌وان هه‌شت یاریزانێن تیما خوه یا خولا پلا نایابا ئیراقێ ل سه‌ر تیما خوه زێده‌كرینه پێخه‌مه‌ت رزگاركرنا تیمێ ژ داكه‌فتنێ بۆ پلا ئێك.
زێده‌تر بێوار بۆسه‌لی بۆ رۆژناما ئه‌ڤرۆ گۆت: ئه‌و ئه‌نجامێن تیما وان د خولا پلا نایابا كوردستانێ دا نه لدووڤ هیڤی و خاسته‌كا مه و جه‌ماوه‌رێ یانێ یه و ئه‌و رێزبه‌ندیا نوكه تێدا كو 20 خالان رێزا 15ێ و دووماهیێ دهێت ب چو ره‌نگان نابیت ئه‌ڤ ئه‌نجامه و رێزبه‌ندیه بمینیت له‌ورا كارگێریا یانێ و ده‌سته‌كا راهێنه‌ران و یاریزان به‌رپرسن ژ ئه‌ڤان ئه‌نجامان و دڤێت ئه‌م هه‌موو ب ئێك هێز پێگڤه كار بۆ ڤه‌گه‌ڕاندنا ناڤ و هێزا زاخۆ بكه‌ین و هێشتا مه ئۆمێد یا هه‌یی مان خوه د خولێ دا پارێزیت ژبه‌ركو پێنچ یاری ماینه و جووداهی گه‌له‌ك نینه ل گه‌ل تیمێن به‌ری مه، بۆ ڤێ یه‌كێ ژی د نوكه دا هه‌شت یاریزانێن تیما زاخۆ یا پشكدار د خولا ئیراقێ دا هاتینه دناڤ راهێنانێن تیما خولا كوردستانێ دا و لسه‌ر لیستا ناڤێن تیمێ هاتینه زێده‌كرن ژبۆ مفا وه‌رگرتن ژ ئاست و شیانێن وان و قورتالكرنا تیمێ ژ داكه‌فتنێ بۆ پلا ئێكا كوردستانێ و هه‌رده‌مێ تیما زاخۆ د خولا ئیراقێ دا یاری نه‌بن ئه‌و یاریزن دێ بۆ یا كوردستانێ به‌رهه‌ڤبن.
ناڤهاتی ئه‌وچه‌نده ژی گۆت: پێدڤی یه د سێ یاریێن بهێت دا هه‌موو بزاڤا بكه‌ین بۆ ده‌ستڤه ئینانا سه‌ركه‌فتنا و ب هیچ ره‌نگه‌گی نه‌هێلین چو خالان ژ ده‌ست بده‌ین ژبه‌ركو یاریێن چاره‌نڤیسن و ژبۆ رزگاركرنا تیمێ یه بۆ داكه‌فتنێ.
