هه‌لبژارتیێ پارێزگه‌هێ ناسناڤێ قاره‌مانیا ئیراقێ ژ ده‌ست دا
ئه‌ڤرۆ، قه‌یس وه‌یس
تیما هه‌لبژارتیێ پارێزگه‌ها دهۆكێ یا كچان ناسناڤێ قاره‌مانیا ئیراقێ بۆ یاریا باسكێت بۆلێ ل سه‌ر ئاستێ لاوان ژ ده‌ست دا پشتی ل گه‌ل خودانێن ئه‌ردی هه‌لبژارتیێ سلێمانیێ تووشی خوساره‌تیێ بووین ب ئه‌نجامێ 76 خالان به‌رامبه‌ر45 خالان و ل رێزا دویێ هاتن، د یاریا وان دا ئه‌وا دوهی ژ چارچووڤێ قاره‌مانیێ ل باژێرێ سلێمانیێ هاتیه ئه‌نجامدان، هه‌لبژارتیێ هه‌ولێرێ رێزا سێیێ هات ب سه‌ركه‌فتنا وێ ل سه‌ر هه‌لبژارتیێ دیالا ب 42- 37 خالان.
لدور ڤێ یه‌كێ ئاشۆر داڤید راهێنه‌رێ هه‌لبژارتیێ پارێزگه‌ها دهۆكێ بۆ رۆژناما ئه‌ڤرۆ گوت: پشكداریا مه بۆ قاره‌مانیێ ب ئارمانجا ده‌ستڤه ئینانا ناسناڤی بوو و مه باوه‌ری ب یاریزانێن خوه هه‌بوو سه‌رباری پرانیا وان بۆ جارا ئێكێ یه پشكداری ئه‌ڤان جوره قاره‌مانیان دبن، پێكهاتیێ هه‌لبژارتێی پارێزگه‌هێ ب نوونه‌راتیا یانا سه‌نحاریب هاتبوو كرن و سۆپاسیا ئێكه‌تیا پارێزگه‌هێ دكه‌ین ئه‌ڤ باوره‌یه دایه مه ، ژ ده‌ست دانا قاره‌مانیێ ژبه‌ر چه‌ند ئه‌گه‌ران ڤه دگه‌ڕینن سه‌رباری ئاست و ئه‌نجامێن باش ده‌ستڤه ئینابوون ژوانا كێم شاره‌زاهیا یاریزانێن گه‌نج كو پرانیا وان د ژیه‌كێ بچووك دانه و هنگاڤتنا ستێرا تیمێ ئه‌وا كارتیكرنا خوه یا نه‌رینی لسه‌ر ئه‌نجامی كری، یا گرنگ ئه‌وه تیمه‌كا ب كچێن پارێزگه‌هێ هاتیه پێكئینان پشتی چه‌ند سالێن مانیبوونێ و پلانێن رێكخستی و ئه‌كادیمی، تیما سلێمانیێ ب هه‌بوونا پشته‌ڤانیا به‌رده‌وام شیان ناسناڤی بده‌ستخوه ڤه‌بینن.
