رێڤه‌به‌رێ گه‌شت و گوزارا زاخۆ: ئه‌ڤ ساله 44% ژ پرۆژه‌یێن زاخۆ دێ گه‌شتیاری بن
زاخۆ، عه‌لی حاجی:
رێڤه‌به‌رێ گه‌شت و گوزارێ ل ئیداره‌یا سه‌ربخوه یا زاخۆ د كۆنگره‌یه‌كێ رۆژنامه‌ڤانی دا دیار كر كو 44% ژ پرۆژه‌یێن ئیداره‌یا سه‌ربخوه یا زاخۆ د ئه‌ڤ ساله دا دێ پرۆژه‌یێن گه‌شت و گوزاری بن و د بێژیت: رێڤه‌به‌ریه‌كا گه‌شت و گوزارێ ل ده‌ڤه‌رداریا باتیفا دێ هێته ڤه‌كرن.
چیا ئه‌مین، رێڤه‌به‌رێ گه‌شت و گوزارێ ل ئیداره‌یا سه‌ربخوه یا زاخۆ گۆت: “هه‌ر ژ رۆژا 18/3 هه‌تا 25/3/2022، پتر ژ 15 هزار گه‌شتیاران سه‌ره‌دانا ئیداره‌یا سه‌ربخوه یا زاخۆ كریه، ژ وانا پێنج هزار گه‌شتیار ژ ناڤه‌راست و باشوورێ ئیراقێ بوون، 120 گه‌شتیار ب رێیا ده‌رگه‌هێ نێڤده‌وله‌تی یێ ئیبراهیم خه‌لیل، سێ هزار و 510 گه‌شتیار و شه‌ش هزار و 811 گه‌شتیارێن ناڤخوه‌یی بووینه، هه‌ڤبه‌ركرن ل گه‌ل سالێن بۆری ئه‌ڤه رێژه‌یه‌كا دلخوه‌شكه‌ره، كو ب ڤێ رێژه‌یێ قه‌ستا ئیداره‌یا سه‌ربخوه یا زاخۆ كرینه”.
گۆتژی: “د رۆژێن نه‌ڤرۆزێ دا گه‌له‌ك گازنده ل سه‌ر به‌رمایك و نه‌بوونا جهێن تایبه‌تێن ده‌ستئاڤێ و لاوازیا هێلێن ته‌له‌فۆنان هه‌بوون، له‌وما وه‌كو رێڤه‌به‌ریا گه‌شت و گوزارێ ل زاخۆ ل گه‌ل سه‌رپه‌رشتێ ئیداره‌یا سه‌ربخوه یا زاخۆ ل سه‌ر خه‌تین بۆ چاره‌سه‌ركرنا ڤان كێشه‌یان، ب تایبه‌تی ژی بابه‌تێ به‌رمایكان، مه داخواز كریه ئێدی راكرنا به‌رمایكان رێڤه‌به‌ریا مه ب ستوویێ خوه ڤه بگریت نه‌ك كۆمپانیا راكرنا به‌رمایكان و هه‌تا راده‌یه‌كی ژی بۆ ڤی بابه‌تی چه‌ند پێنگاڤه‌ك هاتینه هاڤێژتن، داخوازێ ژ كۆمپانیێن په‌یوه‌ندیان ژی دكه‌ین، كو هێلێن خوه باشتر بكه‌ن، ل وان ده‌ڤه‌رێن خه‌لكێ مه قه‌ست دكه‌تێ، ب تایبه‌تی ژی ده‌ڤه‌رێن شیناڤا و بێزهێ و بێتاسێ، د هه‌مان ده‌م دا پێدڤی یه دگه‌ل كه‌رتێ تایبه‌ت هه‌ماهه‌نگیێ بكه‌ین ژ بۆ دانانا ده‌ستشوویان ل وان ده‌ڤه‌ران”.
رێڤه‌به‌رێ گه‌شت و گوزارێ ل ئیداره‌یا سه‌ربخوه یا زاخۆ خویا ژی كر، ل دووڤ پلانا هاتیه دارێشتن، ئه‌ڤ ساله 44% ژ پرۆژه‌یێن ئیداره‌یا سه‌ربخوه یا زاخۆ دێ پرۆژه‌یێن گه‌شتیاری بن، چه‌ندین پرۆژه‌یێن گه‌شتیاری دێ هێنه دروستكرن، بۆ هندێ د سالێن بهێن دا رێژه‌یا هاتنا گه‌شتیاران گه‌له‌ك زێده‌تر بیت و زاخۆ ببیته باژێرێ گه‌شتیاری.
چیا ئه‌مین د وی كۆنگرێ رۆژنامه‌ڤانی دا ئه‌و چه‌نده ژی گۆت: “ب رێیا پلانفۆرمه‌كێ ئه‌م دێ 50 كۆمپانیێن بیانی به‌ینه ده‌ڤه‌رداریا باتیفا، داكو ژ نێزیك باتیفا ببینن و كه‌رتێ گه‌شتیاری ل وێ ده‌ڤه‌رێ زێده‌تر پێشڤه بچیت و زێده‌باری هندێ ژی رێڤه‌به‌ریا گه‌شت و گوزارێ ل ده‌ڤه‌رداریا باتیفا دێ هێته ڤه‌كرن، دیسا ل ناوچه‌داریێن ده‌ركار و رزگاری ژی هنده‌ك كار دێ هێنه ئه‌نجامدان، كو گرێدایینه ب كه‌رتێ گه‌شت و گوزارێ ڤه، مه ل گه‌ل ئیداره‌یا سه‌ربخوه یا زاخۆ هزر د وێ چه‌ندێ دا كرییه، كو زێده‌تر كۆنترۆلا رێژه‌یا گه‌شتیاران بكه‌ین، ژ به‌ركو مه ئه‌و كێشه‌یه هه‌بوو، ب دروستی رێژه‌یا هاتنا گه‌شتیاران نه‌دهاته زانین، له‌وما ل ناوچه‌داریا رزگاری ده‌زگه‌هێ زانیاریان دێ هێته ڤه‌كرن و ب رێیا وی ده‌زگه‌هی دێ ب دروستی زانین چه‌ند گه‌شتیاران قه‌ستا زاخۆ كرییه”.
