سه‌رۆكێ هه‌رێما لۆهانسك: دێ ب ریفراندومێ چاره‌نڤیسێ خوه دیار كه‌ین
ب، سه‌رجان مه‌حمود:
لیۆنید پاسیچینیك سه‌رۆكێ هه‌رێما لۆهانسك د داخۆیانیه‌كێ دا بۆ ده‌زگه‌هێن راگه‌هاندنا ئه‌لمانیا دیار كر كو ٩٣% ژ ئاخا وان هاتیه رزگار كرن و نها ئه‌و هه‌رێما خوه برێڤه دبه‌ن و گۆت: (هه‌تا نها ژ به‌ر پشكه‌ك ژ ئاخا مه ل ژێر كۆنترۆلا ئۆكرانیایێ بوو مه نه‌شیا ریفراندۆما سه‌رخوه‌بوونێ بكه‌ین لێ د ره‌وشا نها دا ئێدی ئاخا هه‌رێما مه هاتیه رزگار كرن و بۆ ڤێ چه‌ندێ ده‌مێ ریفراندۆمێ هاتیه و ئه‌م دخوازین پشتی ریفراندۆمێ ب رۆسیا ڤه بهێنه گرێدان و ژ خوه وه‌ك دیرۆكی ژی لۆهانسك و دۆنتیسك ئانكۆ دۆمباس نه ئاخا ئۆكرانیایێ نه و دڤێت ئه‌م ڤه‌گه‌رینه سه‌ر دیرۆكا خوه و ببینه پشكه‌ك ژ رۆسیا).
سه‌باره‌ت ب ره‌وشا شه‌ری ژی ناڤهاتی راگه‌هاند كو ب به‌رخوه‌دانه‌كا مه‌زن وان شیاینه هێز و هه‌موو ده‌زگه‌هێن ئوكرانیایێ ژ لۆهانسكێ ده‌رخینن و پڕانیا ئاخا هه‌رێما دۆنتیسك ژی نها ل ژێر كۆنترۆلا حوكمه‌تا گه‌ل یا دۆنتیسكێ دایه و گۆت: (هه‌ردو هه‌رێمێن مه ژ سالا 2010 ڤه هه‌ول دده‌ن ب ئاشتیێ و دیالۆگێ پرسێن خوه ل گه‌ل ئۆكرانیایێ ب رێیا دانوستاندنان چاره‌سه‌ر بكه‌ن و ب ئیرادا خوه پاشه‌رۆژا خوه دیار بكه‌ن، لێ ده‌وله‌تا ئۆكرانیایێ خوا‌ست ب دارێ زۆرێ ئاخا مه بكه‌ته ژێر كۆنترۆلا خوه و بۆ ڤێ چه‌ندێ ل سالا 2014 مه بریار دا خوه ژ ئۆكرانیایێ جودا بكه‌ین و مه سه‌رخوه‌بوونا خوه راگه‌هاند لێ ده‌وله‌تا ئۆكرانیا ب جهێ دانوستاندنان شه‌ر هه‌لبژارت و ئه‌نجامێن ئه‌ڤرۆ ژ به‌ر هه‌لوه‌ست و سیاسه‌تا شاش یا ئۆكرانیایێ دروست بوویه).
هه‌ر د ڤێ مژارێ دا به‌رپرسه‌كێ وه‌زاره‌تا به‌رگریێ یا رۆسیا ژی راگه‌هاند كو ژ ئالیێ وان ڤه ده‌وله‌تبوونا هه‌ر دو هه‌رێمێن لۆهانسك و دۆنتیسكێ ب فه‌رمی هاتیه قه‌بوول كرن و هه‌ر ده‌مێ ئه‌و بخوازن ریفراندۆمه‌كێ بۆ دیاركرنا پاشه‌رۆژا خوه ئه‌نجام بده‌ن دێ پشته‌ڤانیێ لێ كه‌ین و گۆت: (د ره‌وشا نها دا ئاخا هه‌ر دو هه‌رێمان هاتیه رزگار كرن و ئێدی دڤێت ب هه‌موو هێزا خوه هه‌ول بده‌ین هه‌موو هه‌رێما دۆمباسێ رزگار بكه‌ین و بۆ ڤێ چه‌ندێ نها قۆناغا ئێكێ ته‌مام بوویه و نها ئه‌م كه‌ڤتینه قۆناغا دویێ كو ئه‌و ژی دهێته رامانا ب ته‌مامی رزگاركرنا دۆمباسێ و د رۆژێن بهێت دا ئانكۆ د ناڤ چه‌ند رۆژان دا دێ ب ته‌مامی رزگاركرنا دۆمباسێ راگه‌هینین).
