یاریزانێن دهۆكێ میدالیێن زێری و زیڤی د قاره‌مانیا ئاسیا دا ب ده‌ستڤه ئینا
ئه‌ڤرۆ،
دو یاریزانێن پارێزگه‌هێ و یانا دهۆك یا وه‌رزشی میدالیێن زێری و زیڤی بۆ هه‌لبژارتیێ ئۆلۆمپی یێ ئیراقێ ب ده‌ستڤه ئینا پشتی شیاین رێزێن ئێكێ و دویێ د قاره‌مانیا ئاسیا یا به‌ریكانا پایسكلان بۆ هه‌ڤڕكیێن سیسته‌مێ كت ئه‌وا ل ل پایته‌ختێ تاچاكستانێ دۆشنبه ب پشكداریا 450 یاریزانان ژ 25 وه‌لاتان هاتیه كرن.
نه‌وزاد مسته‌فا شیا رێزا ئێكێ بهێت و میدالیا زێری ب ده‌ستڤه بینت و هه‌ڤالێ وی سه‌ربه‌ست عه‌بدوللا رێزا سێیێ هات و میدالیا برۆنزی ب ده‌ستڤه ئینا پشتی به‌ریكانێن وان بۆ درێژاهیا 80كم ل سه‌ر ئاستێ 80 یاریزانان هاتیه كرن، ژلایه‌كێ دووڤه هه‌ڤالێ وان یاریزان وه‌هبی سلێمان بۆ به‌ریكانا كت دژی ده‌مژمێرێ رێزا شه‌شێ بده‌ستڤه ئینا.
لدور ڤان ئه‌نجامان و ده‌ستكه‌فتان نه‌وزاد مسته‌فا یاریزانێ هه‌لبژارتیێ ئیراقێ و یانا دهۆك بۆ رۆژناما ئه‌ڤرۆ گوت: گه‌له‌ك كه‌یفخووشم ل گه‌ل هه‌ڤالێن خوه شیاین ناسناڤه‌كێ دیرووكی بۆ ئیراقێ و ناڤێ خوه بینن تایبه‌ت ئه‌م یاریزانێن كورد و هه‌رێما كوردستانێ كو ئه‌ڤ ده‌ستكه‌فته كێم وێنه‌یه و ب سانه‌هی نینه بهێته تۆماركرن، سۆپاسیا راهێنه‌رێ خوه یێ یانا دهۆكێ دكه‌م كو ماندیبوونه‌كا مه‌زن ب مه‌ڤه دیتیه هه‌تا بگه‌هینه ڤی ئاستێ، مه كاروانه‌كێ دی مه‌زن هه‌یه بۆ پشكداریێ د قاره‌مانیێن نێڤده‌وله‌تی دا.
ژلایێ خوه‌ڤه تارق سه‌عید راهێنه‌رێ یانا دهۆكێ دیاركر ده‌ستڤه ئینانا كوڕێن پارێزگه‌هێ بۆ ناسناڤێ ئاسیایی باشترین به‌لگه‌یه كو یاریزانێن دهۆكێ خودان شیانن و دڤێت پشته‌ڤانیا وان بهێته كرن و گۆت: پشكداریا قاره‌مانیا ئاسیا یا فه‌رمی ژلایێ ئێكه‌تیا ئاسیا نه ب سانه‌هی بوو تایبه‌ت هه‌مبه‌ری هه‌لبژارتیێن مه‌زن وه‌كو چاپان، ئیران، ئیمارات، ئۆزپاكستان، تایله‌ند، هندستان، به‌حرێن و ڤێتنام كو سه‌رئاستێ جیهانی هه‌ڤڕكێن ناسناڤا نه و باشترین بنیاتێ وه‌رزشا پایسكلان هه‌یه.
ناڤهاتی ئه‌وچه‌نده ژی دیاركر كو پشتی یاریزانێن دهۆكێ ڤه‌دگڕێنه كوردستانێ دێ به‌رهه‌ڤیان بۆ قاره‌مانیه‌كا نێڤده‌وله‌تی و خولا بژاره یا ئیراقێ كه‌ن، له‌ورا ل ناڤه‌راستا ڤێ هه‌یڤێ دێ كه‌ڤنه د كه‌مپه‌كێ راهێنانێ دا، هیڤییا مه ئه‌وه ژ یانا دهۆك، لژنا ئۆلۆمپی و پارێزگارێ دهۆكێ خوه ل ڤان قاره‌مانا بكه‌نه خودان و رێكخۆشكه‌ربن بۆ ئه‌نجامێن مه‌زنتر.
