بۆ پشكداریێ د خولا ئیراقێ دا رۆژین سه‌عید داخوازا پشته‌ڤانیێ دكه‌ت
ئه‌ڤرۆ، زنار زوبێر:
كاپتنا تیما فوتسالا یانا ئافره‌تێن دهۆك یا وه‌رزشی دلگرانه ژ نه‌بوونا پشته‌ڤانیا وه‌رزشا ئافره‌تان ل كوردستانێ و دیاركر یانێن ناڤه‌راست و باشورێ ئیراقێ مفای ژ شیانێن كچێن كورد دبینن.
زێده‌تر رۆژین سه‌عید د دیداره‌كێ دا بۆ رۆژناما ئه‌ڤرۆ گۆت: سه‌ره‌رای نه‌بوونا پشته‌ڤانیێ ل وه‌رزشا كچان لێ ئاستێ وان گه‌له‌ك باشتره ژ یێن ئیراقێ له‌ورا دخوازین زێده‌تر پشته‌ڤانی ل وه‌رزشا كچان بهێته كرن تایبه‌ت ل پارێزگه‌ها دهۆكێ داكو بشێن پشكداریێ د قاره‌مانی و خولێن ئیراقێ ژی دا بكه‌ین ژبه‌ركو ئاستێ وه‌رزشا كچان پێدڤی ب پێشخستنێ یه بۆ قاره‌مانیێن ده‌رڤه‌ی هه‌رێما كوردستانێ.
رۆژین سه‌عید ئه‌و چه‌نده ژی دیاركر جهێ داخێ یه یانێن هه‌رێما كوردستانێ ب گشتی و تایبه‌ت یێن پارێزگه‌هێ هه‌تا نوكه نه‌شیاینه پشكداریێ د خول و قاره‌مانیێن ئیراقێ دا بكه‌ن ژبه‌ر نه‌بوونا پشته‌ڤانیێ و یانێن ناڤبه‌راست و باشورێ ئیراقێ مفای ژ شیانێن كچێن دهۆكێ و كوردستانێ دبینن و قاره‌مانیان ده‌ستخوڤه دئینن ل سه‌ر كیستێ یاریزانێن مه كو باشترین گروڤه ل سه‌ر ڤێ چه‌ندێ قاره‌مانیا كاسا ئیراقێ ئه‌وا ل رۆژا شه‌مبیا بوری ب دووماهی هاتی پشت به‌ستنا وان هه‌موو یاریزانێن ئافره‌تێن دهۆك و هه‌ولێرێ بوون به‌روڤاژی ئه‌گه‌ر پشته‌ڤانی بۆ یانا ئافره‌تێن دهۆك هه‌با دا شێت باشترین شێوه پشكداریێ كه‌ت و هه‌ڤڕكیا ناسناڤی ژی كه‌ت.
