یاریزانه‌كێ دهۆكێ دێ یاریێ بۆ هه‌لبژارتیێ هۆله‌ندا كه‌ت
ئه‌ڤرۆ، ره‌مه‌زان زه‌كه‌ریا
د داخویانیه‌كێ دا سه‌یاف سلاح یاریزانێ باژێرێ دهۆكێ و ڕه‌ڤه‌ندا كورد ل ئۆرۆپا دیاركر پشتی بۆ ماوێ ساله‌كێ وه‌كو یاریزانێ یاریا كیك بۆكسینگێ پشكداری یه‌كێن راهێنانێ و تاقیكرنێن پراكتیكی و تیۆری ل گه‌ل هه‌لبژارتیێ هۆله‌ند بووی ب فه‌رمی ژلایێ ئێكه‌تیا وی وه‌لاتی هاتیه داخوازكرن بۆ ناڤ رێزێن هه‌لبژارتیێ هۆله‌ندا.
زێده‌تر ناڤهاتی كه‌یفخووشیا خوه دیاركر شیایه بگه‌هیته ئارمانجا خوه یا ئێكێ و گۆت: هه‌رچه‌نده یاریزانێ یاریێن چه‌نگی مه بوو ماوێ 22 ساله لێ پشتی بۆ سێ سال و نیڤه هاتیمه وه‌لاتێ هۆله‌ندا وه‌كو ڕه‌ڤه‌ندا كورد من به‌رده‌وام راهێنانێن خوه كرن و ب فه‌رمی ئێكه‌تیا وه‌لاتێ هۆله‌ندا باوه‌ری دام وه‌كو یاریزانێ وان و دێ دڤێ هه‌یڤێ دا بناڤێ هه‌لبژارتیێ هۆله‌ندا پشكداری قاره‌مانیا نێڤده‌وله‌تی بم كو به‌ری نوكه وه‌كو یاریزانه‌كێ كوردستانی نه‌شیام پشكداربم ژبه‌ركو ئه‌م وه‌لاته‌كێ فه‌رمی نینن لێ ب خووین گه‌رمیا كوردستانی دێ پشكداربم كو ئه‌ڤه ده‌لیڤه‌كا دیرووكی یه دووڤدا دێ پشكداری قاره‌مانیا مانیا ئایند هۆڤن ئه‌وا دێ ل ده‌ستپێكا هه‌یڤا حوزه‌یرانێ ل ولاتێ هۆله‌ندا هێته ئه‌نجامدان.
ژلایه‌كێ دووڤه سه‌یاف سلاح گۆت: خێزان، هه‌ڤال و راهێنه‌رێ من پشته‌ڤانێن سه‌ره‌كی بوون كو به‌رده‌وامبم سه‌ربای ئاسته‌نگا و گه‌شبینم دێ ده‌ستكه‌فتێن دیرووكی تۆماركه‌م.
