ئه‌ڤرۆ دهۆك و زاخۆ پێدڤی ب سه‌ركه‌فتنێ نه
ئه‌ڤرۆ،
چاڤه‌ڕێ دهێته كرن ئه‌ڤرۆ ل ده‌مژمێر 3:30 ئێڤاری هه‌ردو یانێن پارێزگه‌هێ تیما ته‌پا پێی یا یانا دهۆك و یانا زاخۆ د ناڤ ئه‌رد و جه‌ماوه‌رێ خوه دا دێ مێڤانداریا یانێن هه‌ولێرا پایته‌خت و سلێمانیێ كه‌ن ژ چارچووڤێ هه‌ڤڕكیێن گه‌ڕا 28ێ یا خولا پلا نایابا كوردستانێ ئه‌وا ململانه‌كا بهێز دناڤبه‌را هه‌ردو یانێن سیروانی نوو و هندرین و هه‌روه‌سان هه‌ڤڕكی بۆ مانا خوه دخولێ دا دناڤبه‌را هه‌ر چار یانێن زاخۆ، هه‌ولێر، شه‌قلاوه، برایه‌تی و سۆرانه دهێته كرن.
ل یاریگه‌ها خوه یانا دهۆك دێ هه‌ڤڕكا خوه یا رێزبه‌ندیێ یانا ده‌ربه‌ندیخان مێڤان كه‌ت ئه‌وا یاریه‌كا ب سانه‌هی نابیت بۆ خودانێن ئه‌ردی، دهۆك ب33 خالان رێزا نه‌هێ دهێت، مێڤانا وێ ده‌ربه‌ندیخان 35 خالان رێزا حه‌فتێ دهێت، ئه‌نجامێ ڤێ یاریێ دێ گوهۆڕینێ د رێزبه‌ندیا وان دا كه‌ت، پێدڤییه له‌شكه‌رێ هه‌رمان سالحی راهێنه‌رێ دهۆكێ سه‌ركه‌فتنێ تۆماربكه‌ن ژبۆ قه‌ره‌بوویا یاریا بوری ده‌مێ ل گه‌ل پێشمه‌رگا هه‌ولێرێ ب چار گۆلان بێ به‌رامبه‌ر تووشی خوساره‌تیێ بووین ژبۆ ئاشكرنا جه‌ماوه‌ری و ڤه‌گه‌ڕاندنا ئه‌نجامێن باش سه‌رباری ئاستێ وێ د قۆناغا دویێ دا گه‌له‌ك باشتر بووینه.
ژلایه‌كێ دووڤه یانا زاخۆ ئه‌وا هیڤیێن خوه بۆ مانا دخولا پلا نایابا دا گه‌شكرین د یاریا ئه‌ڤرۆ دا دێ مێڤانداریا یانا ئارارات یا هه‌ولێری كه‌ت، د هه‌ردو یاریێن بوری دا زاخۆ شیابوو سه‌ركه‌فتنێ تۆماربكه‌ت و ژ رێزا دووماهیێ خوه بگه‌هینته رێزا 13ێ ب 26 خالان و سه‌ركه‌فتنا ئه‌ڤرۆ ل سه‌ر ئارارات دێ مانا خوه د خولێ دا مسۆگه‌ر كه‌ت، له‌ورا كوڕێن خابیری باش د زانن ئه‌ركێ وان ب سانه‌هی نابیت لێ رژدی و زاخا بلند دێ بیته خالا سه‌ره‌كی یا ده‌ستڤه ئینانا سه‌ركه‌فتنێ سه‌رباری ئارارات تیمه‌كا ب سانه‌هی نابیت بۆ خودانێن ئه‌ردی ئه‌وا ب 34 خالان رێزا هه‌شتێ دهێت.
ژ یاریێن دی یێن ئه‌ڤرۆ، هه‌ولێر- چه‌مچه‌مال، شه‌قلاوه- هندرین، نه‌وروز- سۆران، شێروانه- سیروانی نوو، سه‌ید سادق- پێشمه‌رگا هه‌ولێر، بۆ زانین سیروانی نوو سه‌رێ‌َ لیستێ دهێت ب50 خالان، هندرین ب42 خالان رێزا دویێ و چه‌مچه‌مال ب 39 خالان رێزا سێیێ دهێن.
