ناجی عومه‌ر: تیما مه پێگه‌هه بۆ به‌رهه‌ڤكرنا یاریزانێن گه‌نج
ئه‌ڤرۆ، عه‌لی حاجی:
د داخویانیه‌كێ دا سه‌رپه‌رشتێ تیما ته‌پا پێی یا یانا زاخۆ ئه‌وا پشكدار د خولا پلا نایابا ئیراقێ ل سه‌ر ئاستێ لاوان دیاركر پشكداریا وان ژبۆ مفا وه‌رگرتنێ و شاره‌زاهیێ یه و دبیته پێگه‌ه بۆ به‌رهه‌ڤكرنا یاریزانێن گه‌نج ژ باژێرێ زاخۆ.
زێده‌تر ناجی عومه‌ر بۆ رۆژناما ئه‌ڤرۆ گوت: هه‌رچه‌نده مه پلان دانایه نه بتنێ بۆ پشكداریێ و وه‌رگرتنا مفایی بیت به‌لكو هه‌ڤڕكیێ بۆ رێزێن پێشیێ ژی بكه‌ین، لێ ئه‌و خشته‌یێ د یاریێن قۆناغا ئێكێ دا به‌رژوه‌ندیا مه دا نه‌بوون دیسان گه‌له‌ك بڕیارێن دادڤانان كارتیكرن لسه‌ر ئاستێ یاریزانا و ئه‌نجامان هه‌بوو، به‌ری ده‌ستپێكرنا خولێ ب دو هه‌یڤان به‌رهه‌ڤی هاتبوونه‌كرن و كارگێریا یانێ دڤیا بتنێ تیما مه پشكداریێ بكه‌ت نه‌ك هه‌ڤڕكیێ، مه‌ره‌ما سه‌ره‌كی دروستكرنا یاریزانێن گه‌نج ژ باژێرێ زاخۆ بۆ تیمێن مه یێن پێشكه‌فتی ئانكو ببینه پێگه‌ه بۆ دروستكرنا یاریزانێن خوون گه‌رم، ئه‌م شیاین دپلانا خوه دا سه‌ركه‌فتی بین ژبلی ئێك یاری هه‌موو یاریێن قۆناغا ئێكێ دا ئاستێ یانێ جهێ ده‌ستخووشیێ بوو و هه‌ڤڕكیه‌كا بهێز دكرن بۆ ده‌ستڤه ئینانا سێ خالێن یاریێ سه‌رباری كۆما یانا زاخۆ تێدا بهێز بوو و هه‌كه بڕیارێن شاش یێن دادڤانان ل گه‌له‌ك یاریان نه‌با دا رێزێن پێشیێ بین.
ژلایه‌كێ دووڤه ناڤهاتی ئه‌وچه‌نده ژی دیاركر بۆ قۆناغا دویێ پشتی وه‌رگرتنا پێزانیان سه‌ر ئاستێ هه‌موو یانا گه‌شبینم دێ گوهۆڕینه‌كا باش ل سه‌ر ئاستێ یاریزانان هه‌بیت و بزاڤێ كه‌ین ئه‌و پێنچ یاریێن لدووڤ ئێك دناڤ یاریگه‌ها مه دا مفایی ژێ وه‌ربگرین سه‌رباری پرانیا یانێن پشكدار ب یاریزانێن سه‌خته پشكداریی كرینه به‌روڤاژی زاخۆ كو 16 یاریزانێن مه د ژیه‌كێ بچووك دانه.
