چێلسی ب هیڤیێن تۆماركرنا ریمۆنتادا دێ بیته مێڤانا ریال مه‌درید
ئه‌ڤرۆ،
دهێته چاڤه‌ڕێ كرن ئه‌ڤرۆ ل ده‌مژمێر 10ی شه‌ڤ دو یاریێن ئاگرین و ده‌ربازبوونێ بۆ قۆناغا پێش دووماهیا قاره‌مانیا یانێن ئۆرۆپا قاره‌مانێن خولا چامپیۆنز لیگا یا ته‌پا پێی ژ چارچووڤێ قۆناغا چارێك دووماهیێ و هاتنێ و یا ڤه‌بر بهێنه ئه‌نجامدان.
- ریال مه‌درید – چێلسی
یاریگه‌ها سانتیاگۆ بێرنابیۆ ل پایته‌ختێ ئسپانیا مه‌درید دێ مێڤانداریا خودانێن ئه‌ردی یانا ریال مه‌درید و مێڤانا وێ چێلسی یا ئنگلێزی كه‌ت د یاریه‌كا پری هه‌ڤڕكی و ئاگرین دا ژبۆ ده‌ستڤه ئینانا پلێتا قۆناغا پێش دووماهیێ ئه‌وا دێ ژلایێ دادڤانێ پۆله‌ندی سیمۆن مارتچینیاك هێته بڕێڤه‌برن، ریال مه‌درید د یاریا بوری دا سه‌ركه‌فتنه‌كا مه‌زن ل سه‌ر چێلسی ئینابوو د ناڤ ئه‌رد و جه‌ماوه‌رێ وێ دا ب سێ گۆلان به‌رامبه‌ر گۆله‌كێ و پێنگاڤه‌كا مه‌زن به‌ره ب قۆناغا پێش دووماهیا چامپیۆنزێ هاڤێته، هه‌مبه‌ری وێ یانا چێلسی پێدڤی ب ریمۆنتادێ یه ب سێ گۆلان بێ به‌رامبه‌ر ژبۆ مسۆگه‌ركرنا ده‌ربازبوونێ سه‌رباری ئه‌ڤ هیڤییه دڤێت یاریزانێن وێ شه‌ڕه‌كێ مه‌زن بكه‌ن ژبۆ بجهئینانا وێ، سێ گۆل هه‌مبه‌ر یانه‌كا مه‌زن وه‌كو ریال مه‌دریدێ و ناڤ ئه‌رد و جه‌ماوه‌رێ وێ دا ب سانه‌هی نابیت لێ د ته‌پا پێی دا هه‌موو ئه‌نجام ژی دهێنه پێشبینیكرن، ژلایێ خوه‌ڤه چێلسی دێ ب زاخه‌كا بلند هێته دناڤ یاریگه‌هێ دا تایبه‌ت پشتی د یاریا بوری یا خولا ئنگلیزێ دا سه‌ركه‌فتنه‌كا مه‌زن ل سه‌ر ساوسهامبتۆن ئینایی ب شه‌ش گۆلێن پاقژ كو پالده‌رێ مه‌عنه‌وی دایه یاریزانێن وێ، هه‌رچه‌نده ئه‌نجامێن یانا ریال مه‌درید ل گه‌ل هنده‌ك یانا دناڤ یاریگه‌ها وێ دا باش نه‌بووینه وه‌كو ئه‌یاكس، بایرن، یۆڤانتۆس و شیریڤ، له‌ورا دێ بزاڤێ كه‌ت دناڤ یاریگه‌ها خوه دا خوساره‌ت نه‌بیت و ترسا وێ نه‌هێلیت چێلسی چو گۆلان تۆماربكه‌ت، هه‌رچه‌نده هێزا هێلا هێرشبرنێ بوویه ترسا یانا چێلسی پشتی كو ل یاریا بوری كه‌ریم بنزێمایی شیایی هاتریكێ لسه‌ر وێ تۆماربكه‌ت.
- پێكهاتیێ پێشبینی كری :
دهێته پێشبینی كرن پێكهاتیێ راهێنه‌رێ ریال مه‌درید كارلۆ ئه‌نشلۆتی پلانا 4-3-3 یاریێ بڤی شێوه‌یی بكه‌ت.
گۆلپارێز: تیبۆ كۆرتۆا.
هێلا به‌ره‌ڤانیێ: ناتچۆ، داڤید ئالابا، ئیدیر میلیتاۆ، دانی كارباخال.
هێلا ناڤین: لۆكا مۆدرێچ، كاسێمێرۆ، تۆنی كروس.
هێلا هێرشبرنێ: ڤێنیسیۆس جونیرۆ، كه‌ریم بنزیما، فێدرێكۆ ڤالڤێردی.
ژلایێ خوه‌ڤه راهێنه‌رێ چێلسی یێ ئه‌لمانی تۆماس تۆخێل دێ پلانا خوه ب ئێك هێرشبه‌ر كه‌ته سێ هێرشبه‌ر و بڤی ره‌نگی 3-4-1-2 یاریێ كه‌ت.
گۆلپارێز: ئێدوار مندی.
هێلا به‌ره‌ڤانیێ: ئه‌ندریاس كرێستنسن، تیاگۆ سێلڤا، ئه‌نتونیۆ رۆدرێگر.
هێلا ناڤین: رێس جێمس، نگۆلۆ كانتی، جورجینیۆ، ماركۆس ئالۆنسۆ.
هێلا هێرشبرنێ: میسۆن ماونت، تیمۆ فێرنر، كای هاڤیرتش.
بۆ زانین سه‌ركه‌فتیێ ڤێ یاریێ دێ ل قۆناغا پێش دووماهیێ هه‌مبه‌ری سه‌ركه‌فتیێ یاریا ئه‌تله‌تیكۆ مه‌درید و مانچسته‌ر ستی بیت.
- بایرن میونخ – ڤیاریال
د یاریه‌كا دی یا پری هه‌ڤڕكی و ئاگرین دا جه‌ماوه‌رێ یانا یانا بایرن میونخ یا ئه‌لمانی دێ چاڤ ل یاریا تیما وان هه‌مبه‌ری ڤیاریال یا ئسپانی بن ئێك ژ ئاسته‌نگێن هیڤی و ئارمانجێن وان ئه‌وا دێ ل یاریگه‌ها ئالیانز ئه‌رینا ل میونخێ هێته ئه‌نجامدان، بایرن میونخ دێ لبن گڤاشتنێن جه‌ماوه‌رێ خوه و خوساره‌تیا یاریا بوری یا چوونێ ل گه‌ل یانا ئسپانی هێنه دناڤ یاریگه‌ها خوه دا، هه‌رچه‌نده یاریا چوونێ ب گۆله‌كێ تووشی خوساره‌تیێ بوو كو ئه‌نجامێ ئێكلاكه‌ر نینه لێ دڤێت دو گۆلان بێ به‌رامبه‌ر سه‌ركه‌ڤیت یان جوواهیا گۆله‌كێ سه‌ركه‌فتنێ تۆماربكه‌ت ژبۆ ده‌ستڤه ئینانا پلێتا دویێ یا ده‌ربازبوون بۆ قۆناغا پێش دووماهیا قاره‌مانیێ، یانا باڤاریا دێ ب شاره‌زاهی و هێزا خوه هه‌مبه‌ری یانا ڤیاریال بیت ئه‌وا ئه‌و سه‌ربۆر و سه‌نگا چامپیۆنزێ كێم هه‌یی لێ ئه‌ركێ یاریزانێن ڤیاریالێ و گۆلپارێزی بتنێ گۆلا خوه پارێزین و نه‌هێلن چو گۆل لسه‌ر وان بن ژبۆ گه‌هشتن بۆ ئارمانجا خوه یا چه‌ندین سالان، هه‌رچه‌نده ڤیاریال چو ناسناڤێن چامپینزێ ده‌ستڤه نه ئیاینه لێ وه‌كو تیمه‌كا ب تڕس و خودان ئاخڤتن بوویه شیابوو یانا یۆڤانتۆس یا ئیتالی ل قۆناغا 16ێ دووربێخیت و دیسان ناسناڤێ ئێكه‌تیا ئۆرۆپا یێ سالا بوری ب ده‌ستخوه‌ڤه ئینایه ئانكو تیمه‌كا ب سانه‌هی نابیت، ژلایێ خوه‌ڤه یانا بایرن میونخ ئه‌وا شاره‌زاهیه‌كا باش د چامپیۆنزێ دا هه‌یه دشێت ئه‌نجامێ یاریێ ب گۆهڕیت و پشتبه‌ستنێ لسه‌ر هێرشبه‌رێ خوه گۆلكه‌رێ قاره‌مانیێ رۆبێرت لیڤاندوڤێسكی بكه‌ت.
- پێكهاتیێ پێشبینیكری.
پێشبینی دهێته كرن راهێنه‌رێ یانا بایرن میونخ جۆلیان ناجلسمان ب پلانا 4-2-3-1 یاریێ بكه‌ت كو پلانه‌كا تایبه‌ته و پشتبه‌ستنێ لسه‌ر هێرشێن هه‌ردو لایێن د یاریگه‌هێ دا دكه‌ت و بڤی ره‌نگی.
گۆلپارێز: مانوێل نوێر
هێلا به‌ره‌ڤانیێ: لۆكاس هێرناندز، دایۆت ئۆبامیانكۆ، ئالفۆنسۆ دێڤێس، بنیامێن بافارد،
هێلا ناڤین: لیۆن گۆریتسكا، جوشۆا كێمتچ.
هێلا هێرشبرنێ: كینگێسلی كۆمان، تۆماس مۆله‌ر، سێرجی جنابری.
لیڤاندوڤێسكی هێرشبه‌رێ ئازاد.
پێكهاتیێ پێشبینی كری یێ ڤیاریال كو راهێنه‌ر ئۆنایی ئیمری پشتبه‌ستنێ لسه‌ر كه‌ت ب پلانا 4-4-2 سه‌رباری ژده‌ستدانا دو باشترین یاریزانێن خوه ئه‌لبێرتۆ مۆرینۆ و بۆلایی دییا ژبه‌ر هنگاڤتنێ و بڤی ره‌نگی.
گۆلپارێز: جیرۆنیمو رۆلی.
هێلا به‌ره‌ڤانیێ:خوان فۆیس، پاۆ تۆرێس، رائوول ئالبیول، بیرفێس ئستۆبینان
هێلا ناڤین: جیۆڤانی لۆ سیلسۆ، ئیتیان كابوی، دانی بارێخۆا، ئه‌لفۆنسۆ بێدرازا
هێلا هێرشبرنێ:جیرارد مۆرینۆ، دانگۆما.
بۆ زانین سه‌ركه‌فتیێ ڤێ یاریێ دێ هه‌مبه‌ری سه‌ركه‌فتیێ یاریا لیڤه‌رپۆل و بنڤیكا بن ژبۆ ده‌ستنیشانكرنا پلێتا دویێ یا قۆناغا پێش دووماهیێ.
