جه‌ماوه‌رێ فرانكفۆرت چه‌وا شیا پلێتێن یاریا به‌رشه‌لۆنا ب ده‌ستڤه بینت
ئه‌ڤرۆ،
جه‌ماوه‌رێ یانا فرانكفۆرت یا ئه‌لمانی شیان ب سێ رێكێن جودا 35 هزار پلێتێن یاریگه‌ها كامب نو ده‌ستخوه‌ڤه بینن ژبۆ پشته‌ڤانیا تیما وان هه‌مبه‌ری خودانێن ئه‌ردی یانا به‌رشه‌لۆنا ئه‌وا ب سه‌ركه‌فتنا یانا ئه‌لمانی ب دووماهی هاتی ژ چارچووڤێ قۆناغا چارێك دووماهیا قاره‌مانیا خولا ئۆرۆپا.
رۆژناما مۆندۆ دیبۆرتیڤۆ یا ئسپانی دیاركر یاریا دناڤبه‌را به‌رشه‌لۆنا و ئینتراخت فرانكفۆرت زێده‌تری 35 هزار ژ جه‌ماوه‌رێ یانا ئه‌لمانی ل یاریگه‌ها كامب نۆ ئاماده‌بوون ئه‌وێن سێ ملیۆن و 600 هزار یۆرۆ ل سه‌ر خزینا یانا به‌رشه‌لۆنا زێده‌كری لێ یانا كاته‌لۆنی تووشی خوساره‌تیێ كر ب سێ گۆلان به‌رامبه‌ر دو گۆلان و لسه‌ر كیستێ یانا ئسپانی ده‌ربازبوونه قۆناغا پێش دووماهیا قاره‌مانیێ.
هه‌مان رۆژنامێ دیاركر ب سێ رێكا جه‌ماوه‌رێ ئه‌لمانی شیان ئه‌و هژمارا مه‌زن یا پلێتان بده‌ستڤه بینن، یا ئێكێ كرینا پلێتا ئێكسه‌ر بڕێكا ئه‌نترنێتێ و ڤه‌شارتنا ناسناما وه‌لاتێ خوه، یا دویێ جه‌ماوه‌رێ فرانكفۆرت برێیا هه‌ڤال و كه‌سێن خوه ئه‌وێن ژ ده‌رڤه‌یی ئه‌لمانیا دژین كو ژ سایتێ یانا به‌رشه‌لۆنا ب كرن و بڕیێا پۆستێ ئێمیلی وه‌ربگرن، رێیا سێیێ كرینا پلێتێن به‌رهه‌ڤكری شێوێ پسۆله كو هنده‌ك ژ جه‌ماوه‌رێ یانا ئه‌لمانی ژ یانا به‌رشه‌لۆنا بخوه كری بوون.
