پارێزگارێ دهۆكێ: كه‌سێ ماف نینه ده‌رهه‌مه‌كێ زێده ژ وه‌لاتیان وه‌ربگریت
ئه‌ڤرۆ:
كۆمه‌لا موه‌لیده‌یێن ئه‌هلی ل پارێزگه‌ها دهۆكێ راگه‌هاند پێنج هزار و 250 دینار ل سه‌ر بهایێ ئه‌مپێرێ كاره‌با موه‌لیده‌یان بۆ هه‌یڤا نیسانێ دێ زێده بن، پارێزگارێ دهۆكێ ژی د به‌رسڤێ دا دبێژیت: هیچ كه‌س و لایه‌كی ماف نینه ده‌رهه‌مه‌كێ زێده ژ وه‌لاتیان وه‌ربگریت.
كۆمه‌لا موه‌لیده‌یێن ئه‌هلی ل پارێزگه‌ها دهۆكێ دیار كر، پشتی ل ده‌ستپێكا ئه‌ڤ ساله ژ ئه‌گه‌رێ خرابیا ره‌وشا كاره‌با نیشتمانی و بلندبوونا بهایێ كاره‌با موه‌لیده‌یان، ئیداره‌یا پارێزگه‌ها دهۆكێ پشكه‌ك ژ بهایێ هه‌ردو هه‌یڤێن (1 و 2) ل شوونا وه‌لاتیان ب ستوویێ خوه‌ڤه گرتی وه‌كو بارسڤكیه‌ك، لێ هه‌تا نوكه گه‌له‌ك ژ خودانێن موه‌لیده‌یان ئه‌ڤ پاره وه‌رنه‌گرتیه.
كۆمه‌لا موه‌لیده‌یێن ئه‌هلی ل پارێزگه‌ها دهۆكێ راگه‌هاندیه: كۆمه‌لا موه‌لیده‌یێن ئه‌هلی ل پارێزگه‌ها دهۆكێ بڕیار دایه، هه‌كه هه‌تا 1/5/2022 پاره‌یێ خودانێن موه‌لیده‌یان بۆ نه‌هێته ڤه‌گه‌ڕاندن، پێنج هزار و 250 دینار ل سه‌ر بهایێ ئه‌مپێرێ كاره‌با موه‌لیده‌یان بۆ هه‌یڤا نیسانێ دێ زێده بن.
د عه‌لی ته‌ته‌ر، پارێزگارێ دهۆكێ ل دۆر ڤی بابه‌تی د هژمارا خوه دا ل تۆڕا جڤاكیا فه‌یسبۆكی به‌لاڤكریه، كۆمه‌لا موه‌لیدێن ئه‌هلی راگه‌هاندنه‌ك به‌لاڤكریه ل دۆر گیرۆبوونا پشكه‌ك ژ وی پارێ كو بڕیار بوو حكومه‌ت پێش وه‌لاتیانڤه بده‌ت و تێدا هاتیه: هیچ كه‌س و لایه‌كی ماف نینه ده‌رهه‌مه‌كێ زێده ژ وه‌لاتیان وه‌ربگریت و ئه‌و پارێ مایی ژی ئیدارا پارێزگه‌ها دهۆكێ دێ پێش وه‌لاتیانڤه ده‌ت.
