سه‌ردار عومه‌ر: ب دووماهی ئینانا كاروانێ خوه ب نه‌چاری بوو
ئه‌ڤرۆ، عه‌لی حاجی:
یاریزانێ به‌رنیاسێ پارێزگه‌ها دهۆكێ و یانا زاخۆ سه‌ردار عومه‌ر ب فه‌رمی كاروانێ خوه یێ یاریا ته‌پا پێی ب دووماهی ئینا پشتی بۆ ماوێ 18 سالان یاری ل گه‌ل سێ یانا د خولێن پلا نایاب یێن كوردستانێ و ئیراقێ دا كری.
یاریزانێ ناڤهاتی د دیداره‌كێ دا بۆ رۆژناما ئه‌ڤرۆ گۆت: هه‌ر ده‌ستپێكه‌كێ دووماهیا خوه یا هه‌یی له‌ورا پشتی 18 سالێت خزمه‌تێ د یاریا ته‌پا پێی دا هه‌ر ژ سه‌ر ئاستێ تازه‌پێگه‌هشتی و هه‌تا پێشكه‌فتیان د هه‌ردو خولێن كوردستانێ و ئیراقێ دا یاری بۆ یانێن زاخۆ، دهۆك و ئارارات ئه‌نجامداینه و گه‌له‌ك كاودانێن خوش و نه‌خووش ده‌ربازكرینه و پشكداریا من ل گه‌ل زاخۆ د خولا ئیراقێ دا خووشترین بیرهاتنێن كاروانێ من یێ وه‌رزشی بوو، سۆپاس بۆ خودێ د ماوێ بۆری دا شیایمه ب جوانترین شێوه و ره‌وشته‌كێ پاك دناڤ یاریگه‌هان دا بهێمه دیتن و پێگیری و گۆهداریا راهێنه‌ر و كارگریێن یانێن خوه بكه‌م، لێ ژ ده‌ستدانا بابێ من دڕبه‌ك ب كاروانێ من یێ وه‌رزشی كه‌ت و كارتیكرن ل من كر و بوو ئه‌گه‌رێ سه‌ره‌كی ئه‌ز ده‌ست ژ كاروانێ خوه یێ ته‌پا پێی ل گه‌ل یانێن وه‌رزشی به‌رده‌م، هه‌روه‌سان ده‌لیڤه‌دان ب یاریزانێن گه‌نج ئێك ژ ئه‌گه‌رێن دی بوو له‌ورا 18 سال گه‌له‌ك سه‌ربۆر و وانه تێدا هه‌بوون.
لدووماهیێ سه‌ردار عومه‌ری گۆت: د پلان دایه بۆ پاشه‌رۆژه‌كا نێزك بهێمه دناڤ جیهانا راهێنه‌راتیێ دا و من سه‌ربۆره‌كا باش هه‌یه و تێكه‌لیا راهێنه‌ران كریه و دێ بزاڤێ كه‌م خزمه‌تا وه‌رزشا باژێرێ خوه و كوردستانێ كه‌م و داخوازا لێبۆرینێ ژ هه‌ر كه‌سه‌كی دكه‌م ئه‌گه‌ر من ره‌فتاره‌كا نه جوان كربیت و وه‌زرشڤ ڤیانه و رێزگرتنه.
