یانا زاخۆ ب تۆندی هاته سزادان
ئه‌ڤرۆ،
لژنا داكۆكیێ و دووڤچوونێ ل ئێكه‌تیا ته‌پا پێی یا ئیراقێ چه‌ند بڕیارێن گران و تۆند ل سه‌ر یانا زاخۆ یا وه‌رزشی دانا پشتی ئه‌وان روودانێن ڤێ دووماهیێ ل یاریگه‌ها زاخۆ یا نێڤده‌وله‌تی ژلایێ جه‌ماوه‌رێ وێ ڤه هاتینه ئه‌نجامدان دیاریا واندا ئه‌وا ل پێنچ شه‌مبیا بوری مێڤانداریا كاره‌با كرین تێدا خودانێن ئه‌ردی ب گۆله‌كێ تووشی خوساره‌تیێ بووین و دووڤدا تۆندوتیژی ژلایێ چه‌ند ژ جه‌ماوه‌ری ڤه هاتیه كرن.
لدووڤ نڤێسارا هاتیه به‌لاڤكرن د په‌یچێ فه‌رمی یێ ئێكه‌تیا ته‌پا پێی یا ئیراقێ كو د كۆمبوونا لژنا ناكۆكیێ و دووڤچوونێ دا گه‌نگه‌شه ل سه‌ر راپۆرتا سه‌رپه‌رشت و دادڤانێ یاریا زاخۆ و كاره‌با هاتبوو كرن و ژبه‌ركو یانا زاخۆ به‌رپرسیارا ئێكێ یه یا پاراستنا یاریگه‌هێ و جه‌ماوه‌ری چه‌ند بڕیارێن تۆند هاته راگه‌هاند و بڤی ره‌نگی.
بێ به‌هركرنا تیما ته‌پا پێی یا یانا زاخۆ یاری دناڤ یاریگه‌ها خوه دا هه‌تا دووماهی هاتنا وه‌رزێ ئه‌ڤ ساله یێ خولا پلا نایابا ئیراقێ لدووڤ به‌ندێ پێنچ یێ رێنومایان، هه‌روه‌سان بێ به‌هركرنا جه‌ماوه‌رێ زاخۆ بۆ ناڤ یاریگه‌ها دویێ یا بۆ زاخۆ دهێته ده‌ستنیشانكرن و دیسان سزادانا یانا زاخۆ ب كۆژمێ ده‌ه ملیۆن دیناران ل دووڤ به‌ندێ 14 یێ رێنمایێن لژنا ناكۆكیێ یا ئێكه‌تیا ته‌پا پێی یا ئیراقێ.
