نڤیسه‌ره‌كێ ناڤدار یێ توركیا: پۆتین ناهێلیت توركیا و شام دانوستاندنان بكه‌ن
ئه‌ڤرۆ:
نڤیسه‌ر و ڤه‌كۆله‌ره‌كێ ناڤدار یێ توركیا راگه‌هاند كو ئه‌ردۆغانی دڤێت بابه‌تێ په‌نابه‌رێن سووریێ یێن نها ل توركیا نه چاره‌سه‌ر بكه‌ت و توركیا به‌رهه‌ڤه ل گه‌ل رژێما به‌شاری دانوستاندنان بكه‌ت لێ پۆتین ناهێلیت و ئاسته‌نگیان دروست دكه‌ت.
عه‌بدولقادر سه‌لڤی نڤیسه‌ر و ڤه‌كۆله‌رێ ناڤدار یێ توركیا راگه‌هاند كو ده‌مه‌كه ب فه‌رمانا ئه‌ردۆغانی تیمه‌ك تایبه‌ت به‌رهه‌ڤیان دكه‌ت دا ل گه‌ل رژێما به‌شاری دانوستاندنان بكه‌ن و چه‌ندین جاران ژی ل رۆسیا دانوستاندنان د ناڤبه‌را شاندێ توركیا و سووریێ دا هاتنه كرن، لێ ژ به‌ر كو پۆتینی ده‌ستێوه‌ردان كر ئه‌و دانوستاندنان بێی ئه‌نجام مان و نها ژی توركیا ب هه‌موو ره‌نگه‌كێ دڤێت ل گه‌ل به‌شاری دانوستاندنان بكه‌ت و پرسێن هه‌ی چاره‌سه‌ر بكه‌ت لێ پۆتین ئاسته‌نگیان دروست دكه‌ت و گۆت: (به‌ری نها چه‌ندین جاران به‌رپرسێن رۆسیا هۆشداری داینه توركیا كو نابیت چه‌كێن گران ب تایبه‌تی ژی فرۆكه‌یێن بێ فرۆكه‌ڤان بده‌نه ئۆكرانیایێ، لێ دیاره توركیا گوهداریا رۆسیا نه‌كریه و ژ به‌ر هندێ ژی پۆتین ژ به‌رپرسێن توركیا گه‌له‌ك تووره بوویه و بێی رازیبوونا پۆتینی ژی به‌شار ئه‌سه‌د نه‌شێت چو دانوستاندنان ل گه‌ل توركیا بكه‌ت و هه‌موو بزاڤێن توركیا یێن بۆ ده‌ستپێكرن قۆناغه‌كا نوو ل گه‌ل سووریێ ژی بێی ئه‌نجام ماینه).
ناڤهاتی ئه‌و یه‌ك ژی دیار كر كو نها بابه‌تێ په‌نابه‌رێن سووریێ یێن ل توركیا بوویه ئاریشه‌كا گه‌له‌ك مه‌زن بۆ ده‌ستهه‌لاتا ئه‌ردۆغانی، رۆژ ب رۆژێ ژی وه‌لاتیێن توركیا ژ هه‌بوونا وان په‌نابه‌رێن سووری تووره دبن و ژ به‌ر هندێ ژی ده‌مه‌كه به‌رپرسێن توركیا دبێژن ئه‌و دێ بابه‌تێ په‌نابه‌رێن سووریی چاره‌سه‌ر كه‌ن، یا راست توركیا دڤێت ب رێیا به‌شار ئه‌سه‌دی وی بابه‌تی چاره‌سه‌ر بكه‌ت لێ پۆتین ئاسته‌نگیان دروست دكه‌ت و هه‌تا نها ژی پۆتینی نه‌هێلایه كو چو هه‌ڤدیتنێن نوو د ناڤبه‌را توركیا و سووریێ دا بهێنه كرن و گۆت: (رۆسیا دڤێت ل سووریێ ئاریشێن مه‌زن بۆ توركیا دروست بكه‌ت، به‌ری جه‌ژنا ره‌مه‌زانێ ژی فرۆكه‌یێن شه‌ری یێن رۆسیا ل سووریێ چه‌ندین جاران ئێرشێ هێزێن سه‌ر ب توركیا كرن و ئه‌ز وه‌سا دبینم دێ ئێرشێن فرۆكه‌یێن رۆسیا د به‌رده‌وام بن، چونكو رۆسیا نها ب هه‌موو ره‌نگه‌كێ ل دژی به‌رژه‌وه‌ندیێن توركیا ل سووریێ كار دكه‌ت و ئه‌ز دشێم بێژم كو نها قۆناغه‌كا دژوار ل سووریێ ل دژی توركیا ده‌ستپێكریه).
نڤیسه‌ر و ڤه‌كۆله‌رێ ناڤدار یێ توركیا ئه‌و یه‌ك ژی دیار كر كو دڤێت توركیا ل دۆر بابه‌تێ ئۆكرانیایێ گوهۆرینان د هه‌لوه‌ستێ خوه دا بكه‌ت، چونكو رۆسیا ژ هه‌لوه‌ستێ نها یێ توركیا گه‌له‌ك تووره‌یه، بێگومان دڤێت ئه‌م باش بزانین كو بێی رازیبوونا پۆتینی توركیا نه‌شێت ل گه‌ل شامێ چو هه‌ڤدیتنان بكه‌ت، بێگومان ده‌مێ پۆتین رازی نه‌بیت شام نه‌شێت ل گه‌ل توركیا ئاریشێن هه‌ی ژی چاره‌سه‌ر بكه‌ت.
