هه‌رژه‌نگ بابه‌كر: دێ ب ناڤێ یانا گاره پشكداری خولا كوردستانێ كه‌ین
ئه‌ڤرۆ، شاهۆ فه‌رید:
چاڤه‌ڕێ دهێته كرن ئه‌ڤرۆ تیما ئه‌كادیمیا پیرس ب ناڤێ لاوێن یانا گاره پشكداری وه‌رزێ نوو یێ خولا كوردستانێ بن و یاریا خوه یا ئێكێ دێ مێڤانداریا پێشمه‌رگا هه‌ولێرێ كه‌ن ئه‌وا ده‌ه یانه هاتینه پلاڤكرن ل سه‌ر دو كۆمان و هه‌ر كۆمه‌كێ دو تیم ده‌ربازبنه چارگۆشا زێرین و یاریێن وان ب شێوێ خول ئێك قۆناغ هێنه كرن.
لدور ڤێ یه‌كێ د داخویانیه‌كێ دا هه‌رژه‌نگ بابه‌كر راهێنه‌رێ تیمێ بۆ رۆژناما ئه‌ڤرۆ گۆت: بۆ ماوێ دو هه‌یڤه به‌رهه‌ڤی كرینه ب كه‌مپێن راهێنانێ و یاریێن هه‌ڤالینی كو ب ناڤێ یانا گاره دێ نوونه‌راتیا پارێزگه‌هێ كه‌ین سه‌رباری بزاڤێن مه ب ناڤێ ئه‌كادیمیێ لێ رازه‌مه‌نده نه‌هاته دان، یانا گاره هه‌ڤكاریا مه كر و مه یاریزانێن خوه بێ ئۆمێد نه كرن و دێ یاریێن خوه ل یاریگه‌ها پیرس ئه‌نجامده‌ین و رژدین باشترین ئه‌نجام و ئاست نیشان بده‌ین.
ژلایه‌كێ دووڤه ناڤهاتی ئه‌وچه‌نده ژی دیاركر هه‌ر ژ ده‌ستپێكا دامه‌زراندنا ئه‌كادیمیا پیرس پووته‌دانه‌كا تایبه‌ت ب یاریزانان هاتیه كرن تایبه‌ت ئه‌وێن به‌هره‌مه‌ند و چه‌ندین یاریزانێن خودان شیان په‌یدابووینه و مه‌ره‌ما وان دانانا پێكهاتیه‌كێ ب هێز یێن كوڕێن باژێری بۆ پاشه‌رۆژه‌كا نێزیك و هه‌تا نوكه هه‌موو یاریزانێن مه سه‌ر ئاستێ ئه‌كادیمیا بووینه قاره‌مان.
