رێڤه‌به‌رێ گشتی یێ گه‌شت و گوزارێ: پشتی روودانا په‌ره‌خێ 50% هاتنا گه‌شیاران كێمبوویه
دهۆك، له‌زگین جوقی:
رێڤه‌به‌رێ گشتی یێ گه‌شت و گوزارێ ل پارێزگه‌ها دهۆكێ دیار كر، پشتی هاڤینگه‌ها په‌ره‌خێ ل سنوورێ ئێدارا سه‌ربه‌خوه یا زاخۆ هاتیه بۆردومانكرن و هه‌ژماره‌كا گه‌شتیاران هاتینه شه‌هیدكرن و برینداركرن، هاتنا گه‌شتیاران بۆ پارێزگه‌ها دهۆكێ هه‌ر یا به‌رده‌وامه.
د. خه‌یری عه‌لی، رێڤه‌به‌رێ گشتی یێ گه‌شت و گوزارێ ل پارێزگه‌ها دهۆكێ بۆ رۆژناما ئه‌ڤرۆ گۆت: “گه‌شتیار به‌رده‌وام قه‌ستا پارێزگه‌ها دهۆكێ دكه‌ن، لێ نه ل وی ئاستی نه یێ مه بڤێت، به‌لكو كیمبووینه دشێین بێژین 50% كێمبووینه، ئه‌ڤه ژی بۆ وێ بۆردومانا ل گوندێ په‌ره‌خێ روودای ڤه‌دگه‌ڕیێت و ئه‌م پیشبینی دكه‌ین كه‌رتی گه‌شت و گوزارێ ل كێمیێ بده‌ت”.
ناڤهاتی ئاماژه دا وێ چه‌ند ژی، هه‌كه شه‌ڕ و ئالۆزی بهێنه راوه‌ستاندن دێ كه‌رتێ گه‌شت و گوزاری گه‌له‌ك پێشڤه‌چیت، لێ هه‌كه نه‌هێنه راوه‌ستاندن دێ ئاریشه هه‌بن و گۆت: “د ماوێ 10 رۆژان دا پتر ژ 100 هزار گه‌شتیاران قه‌ستا پارێزگه‌ها دهۆكێ كربوو، ئه‌م چاڤه‌رێ بووین ئه‌ڤ رێژه یا به‌رده‌وام بیت و زێده‌تر ژی بهێن، لێ مخابن پشتی روودانا ل زاخۆ په‌یدابووی كارتێكرن ل كه‌رتێ گه‌شت و گوزارێ ل پارێزگه‌ها دهۆكێ كریه”.
