پڕۆژهیێ نیشتمانی یێ كهلها نزاركێ قووناغ ب قووناغ دێ دهستپێكهت
ئهڤرۆ، زنار تۆڤی:
حهسهن فهتاح، پهیڤدارێ رێڤهبهریا گشتی یا رهوشهنبیری و هونهری ل پارێزگهها دهۆكێ، بۆ رۆژناما ئهڤرۆ ئاشكرا كر، ب سهرپهرشتیا، ئهمیر عهلی، رێڤهبهرێ گشتیێ رهوشهنبیری و هونهری ل پارێزگهها دهۆكێ و ب ئامادهبوونا، ژیان مستهفا، رێڤهبهرا گشتی یا كاروبارێن شههید و ئهنفالكریان، بریندار حهیدهر، رێڤهبهرێ ناوچهداریا مانگێشكێ و نوونهرێ رێكخراوا 88 یا دانهنیاسینا تاوانێن ئهنفالان و د. سالم جاسم، بهرپرسێ سهنتهرێ بێشكچی یێ ڤهكۆلینێن ستراتیژی ل زانكۆیا دهۆكێ و هونهرمهند، گۆهدار سهلاحهدین، خودانێ هزرا پرۆژهیی، كۆمبوونهك هاتیه سازكرن و تێدا بڕیار هاته دان، پڕۆژێ نیشتمانی یێ كهلها نزاركێ قووناغ ب قووناغ بهێته دهستپێكرن، ژ بهركو پڕۆژهكێ مهزنه، بۆ ڤی كاری ههماههنگی ژی ل گهل رێڤهبهری و سازیێن دی یێن خزمهتگوزاری دێ هێته كرن.
ناڤهاتی ئهو چهند ژی دیار كر، ئهڤه پڕۆژهكێ نیشتمانی یێ بهرفرههه و تێدا ئهو تاوانێن ل ئهنفالێن رهش یێن ب سهرێ مللهتێ كورد دا هاتین، دێ تێدا هێنه نیشادان و گۆت: “ئهڤ پڕۆژه ژ چهندین پشكێن جۆدا جۆدا پێك دهێت، پاشكۆیهك ژی ههیه، چهندین تاوانێن دی یێن ژ بلی یێن ئهنفالێ یێن ب سهرێ خهلكێ مه دا هاتین، وهكو كێمیابارانا ههلهبجه، جینۆسایدا كوردێن ئێزدی ل سالا 2014 ێ، ئهو تشته ههموو دێ د ناڤ دا ههبن، ئهڤ پڕۆژه قووناغ ب قووناغ دێ هێته بجهئینان، بڕیاره ل سهر بودجا گهشهپێدانا ههرێمان ڤهدیتن بۆ بهێته كرن و دهست ب پڕۆژهیی بهێته كرن، ل قووناغا ئێكێ كهلها نزاركێ و ئهردێ دهوروبهر، ههموو دێ هێته تێلبهند كرن، پشتی هنگێ دێ دهستپێ هێته كرن”.
