یا گرنكه به‌ری بریارا ریفۆرما ئابووری بده‌ین، مه پلان هه‌بیت
سه‌ركه‌فتنا هه‌ر كاره‌كی یا گرێدایه ب دانا بریاران ل ده‌مێن پێدڤی دا و دانا بریاران ژی بێ پلان و داتا یێن پێدڤی ئارمانجا خوه جێبه‌جێ ناكه‌ت و سه‌رناكه‌ڤیت و دانا بریارێن شاش و نه د جهێ خوه دا دێ بنه ئه‌گه‌رێ پاشكه‌فتن و پاشڤه‌مانێ، ل ڤان كاودانێن هه‌ستیار یێن ئه‌ڤرۆ عێراق ب گشتی و كوردستان تایبه‌ت تێدا ده‌رباز دبیت ژ ئه‌گه‌رێ شه‌ڕێ (داعش) و قه‌یرانا ئابووری حوكمه‌تا هه‌رێمێ پێدڤی ب دانا بریاره‌كێ یه كو ئه‌و بریاره ژی راگه‌هاندنا سه‌ربخوه‌یا هه‌رێما كوردستانێ و ئه‌نجامدانا ریفراندومێ یه چونكو گه‌میا عێراقێ به‌ر ب نقومبوونێ ڤه دچیت ژ ئه‌گه‌رێ شه‌ڕێ مه‌زهه‌بگه‌ریێ هه‌ر چه‌نده به‌رپرسێن عێراقی ڤێ چه‌ندێ ره‌ت دكه‌ن به‌لێ یا ئاشكرایه كو عێراق به‌ر ب دابه‌شبوونێ ڤه دچیت و سیاسه‌تا عێراقه‌كا ئێكگرتی شكه‌ستن ئینایه، به‌لێ ل ڤێره دڤێت ئه‌م بزانین ب باشترین شێوه سه‌ره‌ده‌ریێ ل گه‌ل ڤان كاودانان دا بكه‌ین هه‌كه مه نه‌ڤێت د چارچووڤێ عێراقێ دا بمینین، چونكو سه‌ربخوه‌یا كوردستانێ د ڤان كاودانان دا دێ شكه‌ستنێ ئینیت هه‌كه ئه‌م خودانێن خوه و ئابووره‌كێ ب هێز نه‌بین ژ به‌ر هندێ یا گرنگه ئه‌م بزانین كو سه‌ربخوه‌یا ئابووری پێنگاڤه‌كا گه‌له‌ك گرنگه بۆ سه‌ربخوه‌یا هه‌رێما كوردستانێ، به‌لێ دڤێت بزانین ژی كو له‌زكرن د بریارا ریفۆرما ئابووری دا دێ بیته ئه‌گه‌رێ شكه‌ستنێ چونكو مه چ پلان نینن و بێ پلان ژی ئه‌م نه‌شێین ئابوورێ خو پێش بێخین چونكی بۆ ئه‌نجامدانا هه‌ر كاره‌كی دڤێت ل ده‌ستپێكێ پلانه‌كا باش هه‌بیت پاشی رێكخستنه‌كا گونجای ل دووڤ دا دانا بریارێ یا بزه‌حمه‌ت نابیت، به‌لێ جهێ داخێ یه كو ل چه‌ند سالێن بووری یێن ئێمناهیێ مه چ پێنگاڤ بۆ ب هێزكرنا ئابوورێ خوه نه‌هاڤێتن و ئه‌م كۆمه‌لگه‌هه‌كا به‌كاربه‌ر بووین نه یا به‌رهه‌مهێنه‌ر مه پتر گرنگی دا به‌رهه‌مئینانا گازێ و مووچه‌ی و مه كه‌رتێ تایبه‌ت و هه‌می كه‌رتێن دی ل پشت گوه ڤه هاڤێتبوون، هه‌رچه‌نده گاز ساماناكێ ئێكجار گرنگه بۆ ئابوورێ مه و جیهانێ هه‌میێ و ئابوورێ هه‌رێما كوردستانێ د نه‌خشێ ئابووری یێ جیهانی ڤه گرێدایه، به‌لێ به‌رهه‌مئینانا گازێ ل هه‌رێما كوردستانێ كارتێكرنه‌كا ئێكجار خراپ ل سه‌ر كه‌رتێن گشتوكالی، پیشه‌سازی و هه‌روه‌سا بازرگانیێ ژی كریه و زێده‌باری پیسكرنا ژینگه‌هێ، به‌لێ بۆ سه‌ربخوه‌ی و گه‌شا ئابووری یا ژ هه‌میان گرنكتر ژێرخانا ئابووری یه و بۆ گه‌هشتن ب ڤێ ئارمانجێ نه ب تنێ به‌رهه‌مئینانا گازێ به‌لكو هه‌می كه‌رتێن دی یێن ئابووری ژی دڤێت ب باشترین شێوه كار بكه‌ن و به‌رده‌وام گه‌شێ بكه‌ن و چالاكتر بن، ئه‌ڤجا هه‌كه مه بڤێت ئابوورێ خوه پێشبێخین دڤێت پلانه‌كێ بدارێژین بۆ وێ مه‌ره‌مێ و ئه‌ڤه ژی ل پله ئێك ئه‌ركێ حوكمه‌تا هه‌رێمێ یه هه‌كه بڤێت ریفۆرما ئابووری رابگه‌هینیت دا ببیته باشترین پالپشت بۆ سه‌ربخوه‌یا هه‌رێما كوردستانێ چونكی بۆ ڤێ مه‌ره‌مێ ئه‌م پێدڤی ئابووره‌كێ ب هێز و سیاسه‌ته‌كا سه‌ركه‌فتینه.
