ناڤهندا خانی یا رهوشهنبیری و راگههاندنێ رێز ل ئهمین ئامێدی گرت
ئهڤرۆ، زنار توڤی:
پشتی خزمهتا 30 سالان د بیاڤێ راگههاندنێ دا و پێشكێشكرنا بهرنامێ (چاندن)ێ ل تێلهفزیۆن و رادیۆیا دهۆكێ، دوهی 6/12/2022 ناڤهندا خانی یا رهوشهنبیری و راگههاندنێ د رێورهسمهكێ تایبهت دا رێز ل كارمهندێ خوه (ئهمین یاسین ئامێدی) گرت.
ل دهستپێكا رهورهسمێ ئێحسان ئامێدی، بهرپرسێ ناڤهندا خانی یا رهوشهنبیری و راگههاندنێ پهیڤهك پێشكێش كر و تێدا باسێ كار و خزمهتا (ئهمین یاسین ئامێدی) د دهمێ 30 سالێن بۆری دا كر، ب تایبهت دبیاڤێ چاندنێ دا و گۆت: “ئهمین یاسین ئامێدی خزمهتهكا مهزن یا كهرتێ چاندنێ و جۆتیارێن دهڤهرێ كریه ب رێیا بهرنامێ خوه یێ چاندنێ، كو بۆ دهمێ 3 سالایه بێ راوهستیان پێشكێش دكهت”.
د دووڤ دا پهیڤهك ژ لایێ نوونهرێ وهزارهتا چاندنێ یا حكومهتا ههرێما كوردسانێ ڤه هاته پێشكێش كرن و پاشی فلمهكێ دیكیۆمێنتاری ل سهر ژیانا (ئهمین یاسین ئامێدی) بۆ بهرههڤبوویان هاته نیشادان.
پاشی ئهمین ئامێدی، پهیڤهك پێشكێش كر و ب درێژاهی بهحسێ كار و چالاكی یێن خوه كر د ماوێ 30 سالێن بۆری دا، ل دووماهیا وێ رێورهسمێ ژی دا ههر ئێك ژ ناڤهندا خانی و رۆژناما ئهڤرۆ و دهۆك تیڤی و چهندین جهێن دیتر دیاری پێشكێشی ئهمین ئامێدی كرن.
ئهمین یاسین ئامێدی ل سالا 1960 ژ دایك بوویه، بۆ دهمێ 30 سالانه بهرنامێ (چاندن)ێ ل تێلهفزیۆن و رادیۆیا دهۆكێ پێشكێش دكهت، د ماوێ وان 30 سالێن بۆری دا، هزار و 461 خهلهكه ژ بهرنامێ خوه ل تێلهفزیۆنا دهۆكێ پێشكێش كرینه و ل رادیۆیا دهۆكێ ژی، هزار و 559 خهلهكێن حهفتیانه پێشكیش كرینه، ل گهل 812 راپۆرتێن رۆژانه و ل 54 مێزگهردان.
