ڤێ حهفتیێ داشكاندنا سزایێ گرێ نهدانا پیڤهرێ ئاڤێ دێ ب دووماهی هێت
ههولێر، قائید میرۆ:
بڕیارا داشكاندنا سزایێ گرێ نهدانا پیڤهرێ ئاڤێ ئهڤرۆ 21/12/2022 دێ ب دووماهی هێت و رێڤهبهرێ گشتیێ ئاڤێ ژی ل ههرێما كوردستانێ دبێژیت: مه داخواز كریه داشكاندن یا بهردهوام بیت و بهێته درێژكرن، داكو پترین وهلاتی ژ بڕیارا حوكمهتێ مفادار بن.
ئاری ئهحمهد، رێڤهبهرێ گشتیێ ئاڤێ بۆ رۆژناما ئهڤرۆ دیار كر، ل گورهی بڕیارا وهزارهتا باژێڕڤانی و گهشت و گوزارێ داشكاندن بۆ سزایێ گرێ نهدانا پیڤهرێ ئاڤێ هاتبووكرن، بهلێ ئهڤرۆ رۆژا چارشهمبی دێ دووماهی ب ئهڤێ بڕیارێ هێت و گۆت: “مه پێشنیارهك بۆ حوكمهتێ بلندكریه و تێدا داخواز كریه ژڤانێ داشكاندنا سزایێ گرێ نهدانا پیڤهرێ ئاڤێ بهێته درێژكرن، داكو هژمارهكا زۆرا وهلاتیان ژ وێ بڕیارا حوكمهتێ مفادار بن، ههموو بزاڤهكێ ژی دێ كهین بۆ ڤێ چهندێ داشكاندن بهێته درێژكرن و بارگرانیا ل سهر وهلاتیان بۆ گرێدانا پیڤهرێ ئاڤێ نهمینیت”.
ئاری ئهحمهد گۆتژی: “ل گورهی بڕیارا حوكمهتێ 10%ێ یا گرێدانا پیڤهرێن ئاڤێ ل سهرانسهری ههرێما كوردستانێ زێدهكریه و هژمارهكا زۆرا وهلاتیان رۆژانه سهرهدانا فهرمانگههێن ئاڤێ دكهن بۆ گرێدانا پیڤهرێ ئاڤێ، ژ بهركو ل گورهی بڕیارا حوكمهتێ بۆ ناڤا سهنتهرێ باژێڕان كهسێن پیڤهرێ ئاڤێ نهبن ههتا نوكه بۆ ههر مهههكێ ب 80 هزار دیناران دهاتنه سزادان، بهلێ نوكه ب تنێ بۆ ههر مهههكێ دێ 20 هزار دینار بۆ هێنه هژمارتن بۆ دهرڤهی باژێڕان ژی بۆ ههر مهههكێ 10 هزار دینار دهێنه وهرگرتن”.
