مه‌حفۆز ئیبراهیم بوویه ئه‌ندام د ئێكه‌تیێن ئیراق، عه‌ره‌بی و رۆژئاڤا ئاسیا دا
ئه‌ڤرۆ،
د دیداره‌كێ دا مه‌حفۆز ئیبراهیم سه‌رۆكێ ئێكه‌تیا كیك بۆكسینگا پارێزگه‌ها دهۆكێ و ئه‌ندامێ ئێكه‌تیا ئیراقێ بۆ هه‌مان یاری دیاركر دوباره هه‌لبژارتنا وی بۆ پۆستێ ئه‌ندامه‌تیا ئێكه‌تیا ناڤهاتی ب شیانێن تایبه‌ت بوو دیسان هه‌لسه‌نگاندنا كارێ وی یێ به‌رده‌وام كو بوویه جهێ باوه‌ریا ده‌سته‌كا گشتی ژ سه‌رجه‌مێ 53 ده‌نگا شیا 44 ده‌نگان ده‌ستخوه‌ڤه بینت، د پرۆسێسا هه‌لبژارتنان دا ئه‌وا ل 28ێ كانوونا ئێكێ یا سالا 2022ێ ل باژێرێ به‌غدا هاتیه كرن.
زێده‌تر ناڤهاتی بۆ رۆژناما ئه‌ڤرۆ گۆت: وه‌كو كورده‌ك شانازیێ پێ دبه‌م به‌رده‌وام خزمه‌تا وه‌رزشا پارێزگه‌ها دهۆكێ و كوردستانێ دكه‌م و بوویمه جهێ باوه‌ریا ده‌سته‌كا گشتی ئه‌ڤچه‌نده ژی ب ئه‌وان شیانێن من یێن كه‌سۆكی هاتن، پێنه‌ڤێت ئه‌ڤه ژی ب سانه‌هی نه‌بوویه به‌لكو ب كاره‌كێ مه‌زن و پلانێن رێكخستی كو بتنێ مه‌ره‌ما مه چاوانیا پێشكه‌فتنا وه‌رزشێ ل پارێزگه‌ها دهۆكێ و كوردستانێ و ئیراقێ و هه‌روه‌سان رێكخستنا چه‌ندین قاره‌مانیا ل پارێزگه‌ها دهۆكێ ژی ئه‌گه‌ره‌كێ دی یێ سه‌ركه‌فتنێ بوو.
هه‌روه‌سان مه‌حفۆز ئیراهیم گۆت: زێده‌باری ئه‌ندامبوونا من ل گه‌ل ئێكه‌تیا ئیراقێ بۆ جارا ئێكێ د دیرۆكا یاریا كیك بۆكسینگا پارێزگه‌ها دهۆكێ و كوردستانێ دا وه‌كو كورده‌ك ب شێم باوه‌ریا دو ئێكه‌تیێن وه‌رزشی د ئێك ده‌م دا وه‌ربگریت وه‌كو ئه‌ندام دناڤ لژنێن به‌ریكانا بهێته ده‌ستنیشانكرن یێن ئێكه‌تیا عه‌ره‌بی و رۆژئاڤا ئاسیا، ئه‌ڤچه‌نده پێنگاڤه‌كا مه‌زنه و به‌رپرسیاره‌تیه‌كا ب سه‌نگه بۆ داهاتی هه‌موو بزاڤا بۆ خزمه‌تا وه‌رزشا پارێزگه‌هێ و وه‌لاتێ خوه كوردستانێ بكه‌م و یا د شیان دابیت مفایی ب گه‌هیمه هه‌موو وه‌رزشڤانان.
لدووماهیێ ژی ناڤهاتی سۆپاسیا هه‌ر لایه‌نه‌كێ هاریكار و پشته‌ڤانی بوو كری و گوت: ئه‌م رژدین به‌رده‌وام بۆ پێشكه‌فتنا وه‌رزشا یاریا كیك بۆكسێنگێ ل پارێزگه‌هێ و كوردستانێ و دێ بزاڤێ كه‌م كارێن باشتر و نێزیك بوون د ناڤبه‌را ئێكه‌تیا عه‌ره‌بی و رۆژئاڤا ئاسیا ل گه‌ل كوردستانێ.
