پارێزگارێ دهۆكێ دووڤچوونا چهندین پڕۆژهیێن خزمهتگوزاری كر
ئهڤرۆ:
ب مهرهما دووڤچوونا پڕۆژهیێن خزمهتگوزاری ئهوێن ل سهنتهرێ باژێرێ دهۆكێ دهێنه ئهنجامدان دوهی 2/1/2023 د. عهلی تهتهر، پارێزگارێ دهۆكێ و ماجد سهید سالح، جێگرێ پارێزگاری بۆ كاروبارێن تهكنیكی و جهوههر عهلی، دهڤهردارێ دهۆكێ سهرا چهندین پڕۆژهیان د ناڤ سهنتهرێ باژێڕێ دهۆكێ دا و ژ لایێ مللهت سالم، سهرۆكێ باژێرڤانیا دهۆكێ پێشوازی لێ هاته كرن.
پارێزگارێ دهۆكێ و شاندێ د گهل دا سهرهدانا پڕۆژهیێ ڤهكرن و قێركرنا جادهكا دو سایدی یا 30 متری ل نێزیك پهیمانگهها داڤنشی ل تاخێ ماسیكێ ههتا دگههیته تاخێ زركا ب درێژاهیا دو كیلۆمهتر و 250 مهتران كر و ههتا نوكه 23% ژێ هاتیه ئهنجامدان پڕۆژه ب گوژمێ دو ملیار ملیار و 927 ملیۆن دیناران ل سهر بودجا حكومهتا ههرێمێ دهێته بجهئینان.
دیسا سهرهدانا پڕۆژهیێ ڤهكرن و قێركرنا جادهكا دو سایدی یا 30 متری ل تاخێ نزاركا نوو ب درێژاهیا هزار و 300 متران دا و ههتا نوكه 90% هاتیه ئهنجامدان و پڕۆژه ب گوژمێ ملیارهك و 750 ملیۆن دیناران ل سهر بودجا حكومهتا ههرێمێ دهێته ئهنجامدان، ل دووماهیێ سهرا پڕۆژهیێ چێكرن و قێركرنا 13 كیلۆمهترێن رێكێن ناڤخوهیی ل تاخێن ئێتیتێ و نزاركێ و جهێن دی دا، كو ههتا نوكه 85% هاتینه چێكرن و پڕۆژه ب گوژمێ نێزیكی ملیار دیناران ل سهر بودجا حكومهتا ههرێما كوردستانێ دهێته ئهنجامدان.
پارێزگارێ دهۆكێ دهستخوشی ل سهرۆكاتیا باژێرڤانیا دهۆكێ و كومپانیێن بجهئینهر كر و خواست كو ههموو پڕۆژه ب كوالیتیهكا باش بهێنه چێكرن و تهكهز كر كو حكومهتا ههرێما كوردستانێ دێ ل سالا نوو ژی و د ههموو سهكتهران دا پڕۆژێن خزمهتگوزاری گههینیته ههموو خهلكێ پارێزگههێ.
