یانا به‌رده‌ره‌ش تووشی ئاریشا كربوویه
ئه‌ڤرۆ،ره‌مه‌زان زه‌كه‌ریا.
د داخویانیه‌كێدا سه‌رۆكێ یانه‌یا به‌رده‌ره‌ش یا وه‌رزشی دیاركر د نوكه دا كار لسه‌ر دروستكرنا یاریزانێن نوو یێن تازه‌پێگه‌هشتی دكه‌ین ژبه‌ركو ئه‌ڤ یاریزانێن گه‌نج دێ بنه بناغه‌یه‌كێ باش بۆ یانێ و وه‌رزشا كوردستانێ له‌وما نوكه مه هه‌موو ده‌مێ خوه ته‌رخانكریه بۆ دروستكرنا یاریزانێن نوو.
زێده‌تر سه‌میر عه‌بدولقادر بۆ ئه‌ڤرۆ گۆت: هه‌تا نوكه ده‌مێ ئه‌نجامدانا یاریێن خولا پله دو یا كوردستانێ نه‌هاتینه دیاركرن كو ئه‌م پتر خوه به‌رهه‌ڤ بكه‌ین له‌وما ل جهێ به‌رهه‌ڤیا بۆ خولا پله دو ئه‌م كار لسه‌ر دروستكرنا یاریزانێن نوو دكه‌ن ل ده‌ڤه‌را به‌رده‌ره‌ش، لێ دێ به‌رهه‌ڤ بین هه‌ر ده‌مێ ژڤانێ خول هاته‌ئاشكراكرن نه ب تنی بۆ یا كوردستانێ به‌لكۆ بۆ خولا ئیراقێ ژی.
ناڤهاتی ئاشكراكر: ئاریشا سه‌ره‌كی یا یانه‌یا به‌رده‌ره‌ش نه‌بوونا پشته‌ڤانیا دارایه ئه‌گه‌ر پشته‌ڤانی نه‌هێته كرن دێ ره‌وشا یانا خرابتر بیت نه ب تنێ یانه‌یا مه به‌لكۆ گشت یانه‌یێن به‌هدینان هه‌تا پله ئێكا ژی له‌وما دخوازین بۆ باشتركرنا ره‌وشا وه‌رزشێ پشته‌ڤانیا یانه‌یان بهێته كرن.
سه‌رۆكێ یانه‌یا به‌رده‌ره‌ش گۆت: یاریگه‌ها مه یا ته‌پاپێی لاواز بوویه سه‌ره‌رای خرابیا ره‌وشا ئابووری ژی گه‌له‌ك بێ سه‌رو به‌ر بووه، نوكه نه‌بوونا یارگه‌هه‌كا باش و پشته‌ڤانیا دارایی مه‌زنترین ئاریشێن یانا وه‌رزشی یا به‌رده‌ره‌شن.
