ب چ رێك زاخۆ دێ ده‌ربازبیته چارگۆشا زێرین ؟
ئه‌ڤرۆـ زاخۆ، عه‌لی حاجی:
فۆتۆ: ئازاد زۆم
د داخویانیه‌كێ دا سه‌رپه‌رشتێ تیما باسكێت بۆلا یانه‌یا زاخۆ دیار كر تیما وان پێدڤی ب چار سه‌ركه‌فتنا هه‌یه هه‌تا بشێت ده‌ربازبیته قۆناغا پله‌یی ئۆڤ و چارگۆشا زێرین یا خولا پلا نایابا ئیراقێ و رژدن بۆ ڤێ ئارمانجێ.
زێده‌تر عه‌بدولستار عه‌لی گۆت: پشتی شه‌ش سه‌ركه‌فتنێن ل دووڤ ئێك د خولێ دا تیما مه ئیناین ئه‌ڤچه‌نده بوو ئه‌گه‌ر ده‌رگه‌هێ چارگۆشا زێرین بهێته ڤه‌كرن و هیڤیێن مه‌زن بۆ ده‌ربازبوونا پله‌یی ئۆڤ په‌یدابن، له‌وما د نوكه دا تیما مه ژ هه‌موو روویه‌كی ڤه د باشترین قۆناغ دایه و گیانێ سه‌ركه‌فتنێ و هه‌ڤڕكیێ په‌یدابوویه، هه‌روه‌سان ئاستێ هه‌موو تیمان نێزیكی ئێكه لێ یاگرنگ بوو مه د هه‌ر پێنچ یاریێن مایی ژ خولێ دا ئه‌وێن دێ د ناڤ یاریگه‌ها مه دا بن ب تنێ ئه‌م پێدڤی ب چار سه‌ركه‌فتنان هه‌نه ژبۆ ده‌ربازبوون به‌ر ب چارگۆشا زێرین بێ چاڤه‌ڕێ بوون ب هه‌ر ئه‌نجامه‌كێ دیتر.
هه‌روه‌سان ناڤهاتی دیاركر پشته‌ڤانیا دارایی و مه‌عنه‌وی ل تیما مه دهێته كرن و ئه‌و ژی فاكته‌ره‌كێ سه‌ره‌كی یه ب ده‌ستڤه ئینانا ئه‌نجامێن باش و گۆت: پێدڤی یه دناڤ یاریێن بهێت دا ئاست و ئه‌نجامێن مه به‌رده‌وامبن و باشتر ژی بن و مه باوه‌ریه‌كا مه‌زن ب تیما خوه هه‌یه دێ گه‌هینه ئارمانجا خوه.
