ترۆمبێل ب شێوەیێ قست دێ هێنە فرۆتن بۆ مامۆستایان
ئەڤرۆ
قائید میرۆ:
ئێكەتیا مامۆستایێن كوردستانێ ل گەل كۆمپانیەكا تڕۆمبێلان رێكەفتیە و ترۆمبێل ب قست و ئەرزانتر ژ بهایێ فرۆتنێ ل سەر مامۆستایان دێ هێنە بەلاڤكرن و سەرۆكێ ئێكەتیا مامۆستایان ژی دبێژیت: تڕۆمبێل ب بهایێ كێمتر ژ بازاڕینە و ب شێوەیێ قست بۆ مامۆستایان دێ هێنە دان.
ئەحمەد گەرمیانی، سەرۆكێ ئێكەتیا مامۆستایێن كوردستانێ بۆ رۆژناما ئەڤرۆ دیار كر، ئێكەتیا مامۆستایان ل گەل كۆمپانیەكا ئینانا تڕۆمبێلان رێكەفتن كریە، كو تڕۆمبێل ب شێوەیێ قستێن دۆمدرێژ و پێشەكیەكا كێم ل سەر مامۆستایان بهێنە بەلاڤكرن و گۆت: «هەر مامۆستایەكێ بخوازیت تڕۆمبێلەكێ ب قست و كێمتر ژ بهایێ بازاڕێ بكڕیت، ل لقێن دهۆك و سلێمانی و هەولێرێ دشێت ل گورەی مەرجێن پێدڤی ژ كڕینا تڕۆمبێلێ مفادار بیت».
ئەحمەد گەرمیانی گۆتژی: «ئێكەتیا مامۆستایان رێكەفتن ل گەل كۆمپانیا باجگر و بانكا جیهان ئەنجامدایە و هەموو مامۆستایان ماف هەیە تڕۆمبێلا جۆرێ جێلی بێی پێشەكی و ب قست ل كۆمپانیێ بكڕن، هەر مامۆستایەكێ تڕۆمبێلێ بكڕیت، بهایێ هزار دۆلاران كێمتر ژ بهایێ بازاڕی دێ مفادار بیت، مەرجێن كڕینا تڕۆمبێلێ ژی: دڤێت ئەندامێ ئێكەتیا مامۆستایێن كوردستانێ بیت و دو كەفیل هەبن بێی تاپۆیا خانی».
