قشلا زاخۆ دێ هێتە نووژەنكرن
ئەڤرۆ
زاخۆ، دلۆڤان هالۆ:
ئێك ژ شوونوارێن مێژوویی یێن گرنگ یێن سەر ب ئیدارەیا سەربخوە یا زاخۆ ڤە، كو قشلا زاخۆ یە دێ هێتە نووژەنكرن و بیتە مۆزەخانەكا مەزن.
محەمەد ئەحمەد، ڕێڤەبەرێ شوونوار و كەلەپووری ل ئیدارەیا سەربخوە یا زاخۆ بۆ ڕۆژناما ئەڤرۆ دیار كر، ل سەر بودجەیا گەشەپێدانا شوونواران یا سەر ب وەزارەتا باژێڕڤانی و گەشتوگوزارێ ڤە، ب گوژمێ 53 ملیۆن دیناران قشلا زاخۆ دێ هێتە نووژەنكرن و دێ بیتە مۆزەخانەكا مەزن.
ڕێڤەبەرێ شوونوار و كەلەپوورێ زاخۆ ئاماژە ب وێ چەندێ ژی كر كو پشتی نووژەنكرنێ ب شێوەیەكێ دەمكی ب تنێ ب دوو ژووران دێ بیتە ئاڤاهیێ ڕێڤەبەریا شوونوار و كەلەپوورێ زاخۆ، دیسا د پاشەڕۆژێ دا ژی دێ بیتە مۆزەخانەكا شوونواری یا مەزن و گۆت: «ل گورەی ژێدەرێن مێژوویی ئاڤاكرنا قشلا زاخۆ بۆ بەری هزار و 100 سالان دزڤڕیت، كو د كەڤن دا ژ دو پشكان پێك دهات، ئەو ژی پشكێن قوتابخانە و زیندان بوون».
