ئاڤاهی ل كوردستانێ ل گۆرەی كۆدێ ئەمریكا بۆ بیڤەلەرزان دێ هێنە ئاڤاكرن
ئەڤرۆ
هەولێر، قائید میرۆ:
وەزیرێ ئاڤاكرنێ یێ حوكمەتا هەرێما كوردستانێ ئاشكرا كر، ژ نوكە پێڤە رێنمایێن نوو بۆ ئاڤاكرنا ئاڤاهیان دێ هێنە دەركرن و ل گورەی كۆدێ ئەمریكا بۆ بەرهنگاربوونا بیڤەلەرزان ئاڤاهی دێ هێنە ئاڤاكرن و پێداچوون ژی د ئاڤاهیان دا دێ هێتە كرن.
دانـــــــا عەبدولكەریـــــــم، وەزیـــــــــــــــرێ ئاڤەدانكــــــــــــــــــــرنێ ل حوكمەتا هەرێما كوردستانێ د كۆنگرەیەكێ رۆژنامەڤانی دا راگەهاند:
«ئاڤاهیێن هەرێما كوردستانێ شیان هەنە هەمبەر 6 پلەیێن رێختەر یێن بیڤەلەرزێ خوە راگرن، بەلێ پێدڤیە ژ نوكە پێڤە ئاڤاهیێن هەرێما كوردستانێ ل سەر كۆدێ ئەمریكا بهێنە ئاڤاكرن، بڕیار هاتیە دان پێداچوون د دیزانێ ئاڤاهیان دا بهێتە كرن، دڤێت خەمساری د بجهئینانا پڕۆژێن ئاكنجیبوونێ و ئاڤاهیان دا نەهێتە كرن، هەموو مەرجێن پێدڤی تێدا هەبن و ل گورەی ستاندەردێن جیهانی ئاڤاهی بهێنە ئاڤاكرن».
دانا عەبدولكەریم گۆت: «هەرێما كوردستانێ دكەڤیتە سەر هێلا ناڤنجی یا بیڤەلەرزێ، لەوڕا ژی ئەم نابێژین مەترسی نینە، بەلێ مەترسیێن وێرانكەر ژی ل سەر هەرێما كوردستانێ نینن، وەك بەرهەڤیەك بۆ هەر ئەگەرەكێ د دەمێ پەیدابوونا بیڤەلەرزێ دا، رێنمایی دێ هێنە دەركرن و د دەمێ بجهئینانا پڕۆژە و ئاڤاكرنا ئاڤاهیان دا پێدڤیە ژ لایێ ئەندازیاران ڤە بەرچاڤ بهێنە وەرگرتن».
