رۆژا جیهانی یا زمانێ دایكێ ل دهۆكێ ب هەژمارەكا چالاكیان هاتە ساخكرن
ئەڤرۆ
ب هەلكەفتا رۆژا جیهانی یا زمانێ دایكێ، دوهی ئەڤ هەلكەفتە ل هەردو زانكۆیێن دهۆك و نەورۆز و ئێكەتیا نڤیسەرێن كورد لقێ دهۆكێ ب چەندین چالاكیان هاتە ساخكرن و باس ل زمانێ دایكێ و گرنگیا زمانێ كوردی هاتە كرن.
ب هەلكەفتا رۆژا جیهانی یا زمانێ دایكێ و ب بەرهەڤبوونا د. عەلی تەتەر، پارێزگارێ دهۆكێ و فەهیم عەبدوللا، سەرۆكێ جڤاتا پارێزگەهێ و هەژمارەكا بسپۆر و زمانزانێن كورد دوهی 21/2/2023 ل هۆلا زانكۆیا نەورۆز دیدارا زمانێ كوردی هاتە سازكرن.
د. عەبدولوەهاب خالد، سەرۆكێ زانكۆیا نەورۆز د پەیڤەكێ دا ب هەلكەفتا رۆژا جیهانی یا زمانێ گۆت: «مە ب فەر دیت ڤێ رۆژێ ب چەندین سمیناران ساخ بكەین و گرنگیێ بدەینە زامانێ دایكێ».
د. عەلی تەتەر، پارێزگارێ دهۆكێ د پەیڤەكێ دا بەحسێ گرنگیا زمانێ كوردی و زمانێ دایكێ كر و گۆت: «دوژمنان هەردەم بزاڤكریە، كو زمانێ كوردی ژناڤ ببەن، پشتی سەرهلدانا بهارا 1991 حوكمەتا هەرێما كوردستانێ بیاڤ خوەش كریە، كو زمانێ دایكێ بهێتە خواندن و پێشئێخستن، دیسا هەكە زمان نەما چ تشتێن دی نامینن، لەورا دڤێت هەر تاكەكێ كورد و سازیێن فەرمی گرنگیێ ب زمانێ كوردی بدەن و ب پارێزن، هەروەسا هەموو لایەن رێزێ ل زمانێ دایكێ یێ هەموو پێكهاتێن هەرێمێ ژی بگرن».
پاشی پانێلێ ئێكێ ل دۆر زمانێ دایكێ ب پشكداریا (د. فازل عومەر، د. عەبدوسەلام نەجمەدین، د. یاسرێ حەسەن و مامۆستا زەكیا حەسەن) دەستپێكر و سمینارێن خوە ل دۆر رەوشا زمانێ كوردی و چاوانیا پێشئێخستنا زمانێ دایكێ ل ناڤ سازیێن فەرمی دیاركرن و گەنگەشەكا تێروتەسەل ل سەر سمیناران ژ لایێ بەرهەڤبوویان ڤە هاتەكرن.
دیسا دوهی ئێڤاری ژی و ب مەرەما بەردەوامی دان ب دیدارێ و د پانێلێ دویێ دا ل هۆلا ئێكەتیا نڤیسەرێن كورد لقێ دهۆكێ (د. محەمەد سالح، د. ئەمین عەبدولقادر و د. شیڤان شلیمۆن توما) سمینارێن خوە ل دۆر گرنگیا زمانێ دایكێ پێشكێش كرن.
دیسا هەر ب هەلكەفتا رۆژا جیهانی یا زمانێ دایكێ و ل ژێر درووشمێ (پاراستنا زمانێ دایكێ بەرپرساتیەكا نەتەوەیی یە) دوهی ل هۆلا كۆنگران ل زانكۆیا دهۆكێ ب بەرهەڤبوونا د. عەلی تەتەر، پارێزگارێ دهۆكێ و فەهیم عەبدوللا، سەرۆكێ جڤاتا پارێزگەهێ و چەندین بسپۆر وزمانزانێن كورد كوڕبەندێ گرنگیدانا سیاسەتا زمانی ل سازیێن ئەكادیمی هاتە گێڕان.
پشتی پەیڤا بخێر هاتنێ پانێلێ ئێكێ دەستپێكر و (د. داود ئەترووشی، سەرۆكێ زانكۆیا دهۆك و د. ڤیان سلێمان و د. هەوار نێروەیی) سمینارێن خوە ل دۆر رەوشا زمانێ كوردی و چاوانیا پێشئێخستنا زمانێ دایكێ ل ناڤ سازیێن فەرمی بەرچاڤكرن و گەنگەشەكا تێروتەسەل ل سەر سمینارێ هاتە كرن.
دیسا هەر ب هەلكەفتا رۆژا جیهانی یا زمانێ دایكێ، ل سەرانسەری پارێزگەها دهۆكێ چالاكیێن جودا ژ بۆ ساخكرنا ڤێ رۆژێ هاتنە ئەنجامدان و تێدا دوپاتی ل سەر گرنگیا زمانێ دایكێ و زمانێ كوردی هاتە كرن.
