دناڤ ئەردێ فرۆكخانا دهۆك دا 13 شوونوار دهێنە دیتن
ئەمیر ئەترووشی
رێڤەبەرێ شوونوار و كەلەپۆری ل پارێزگەها دهۆكێ راگەهاند، د دەمێ لێگەریانا شوونواران دا ل سنوورێ پارێزگەها دهۆكێ، تیمێن وان شیاینە 13 شوونواران ل سەر ئەردێ هاتیە تەرخانكرن بۆ چێكرنا فرۆكخانا دهۆكێ یا نێڤدەولەتی دا ببینن و هاتینە پاراستن.
د. بێكەس بریفكانی، رێڤەبەرێ شوونوار و كەلەپۆری ل پارێزگەها دهۆكێ بۆ ئەڤرۆ دیار كر، ل سەر ئەردێ هاتیە تەرخانكرن بۆ چێكرنا فرۆكخانا دهۆكێ یا نێڤدەولەتی ل سنوورێ قەزا سێمێلێ، تیمێن وان شیاینە 13 شوونواران ببینن، ئەڤە ژی نیشانە بۆ هندێ كو دەڤەرەكا مێژوویی و دێرین ل وی جهی هەبوویە و گۆت: د ناڤا وان شوونواران دا ئاشكرابوویە كو ل سەردەمێ میتانیان پەرستگەهەك ل وێ دەمێ هەبوویە و مێژوویا وێ ڤەدگەریت بۆ (1350-1550) سالان بەری زایینی.
زێدەتر گۆت: ئەو كەسێن دناڤا ئەردێ فرۆكخانێ دا كاردكرن ئەم ئاگەهداركربووین و گەلەك ب باشی ئەو شوونوارە پاراست بوون و ماینە ل جهێ خۆ و دێ ب باشترین شێوە هێنە پاراستن.
دهێتە زانین، پتر ژ 1700 پارچەیێن شوونواری ل دەڤەرا بادینان ژ وان جهێن شوونواری هاتینە خرڤەكرن د مۆزەخانا دهۆك دا، دهەر سالەكێ دا دێ جهەك یان دو جهێن شوونواری ل دووڤ شیانان هێنە سەخبێركرن، هەتا ئەو جهێن شوونواری یێن رێیا وان ژی نەخۆش دێ بزاڤ هێنە كرن بهێتە خوشكرن لێ رەنگە ئەڤ رێخوشكرنە كارتێكرنێ ل جهێن شوونواری بكەت و خەلك چاڤێ خۆ نەدەتێ.
شارەزا د وارێ جهێن شوونواری دا ئاشكرا كر كو ل سالا 1985ێ زانكۆیەكا پۆلونی ڤەكۆلین د شوونوارێن دەڤەرێ دا ل گوندێ نەمریكێ ل فەیدیێ كرینە و ئاشكرا بوویە كو نەمریكێ كەڤنترین گوندە چاندن لێ هاتیە كرن و گۆت: (ل سالا 2005 مە بۆ ئێكەمین جار ڤەكۆلینێن شوونواری ل شكەفتا چوارستین كرن و تێدا چەندین سەردەمێن مێژوویی ب تایبەت یێن زەرادەشتی ئاشكرا بوون، كو بۆ ئێكەمین جار بوو هەبوونا زەرادەشتیان ل دەڤەرێ هاتیە سەلماندن).
ل سالا 2008ێ ل كەلیێ شەدایێ ڤەكۆلین هاتنە كرن و پاشمایێن شارستانیەتا مسری و پەیكەرێ فیرعەونی هاتنە ئاشكرا كرن، دیسا ب بەلگەڤە پاشمایێن زەرادەشتی هاتنە ئاشكرا كرن.
