زانكۆیا دهۆك كۆڕبەندەك ل دۆر ئەركێ سێیێ یێ زانكۆیێ ئەنجام دا
ئەڤرۆ
زانكۆیا دهۆك ل ژێر درووشمێ «بەرەڤ كارتێكرنەكا باشترا جڤاكی و ئابووری» كۆڕبەندێ «ئەركێ سێیەمێ زانكۆیا دهۆك و كارتێكرنێن جڤاكی ٢٠٢٣ێ» نجامدا.
ب بەرهەڤبوونا هەردو جێگرێن پارێزگارێ دهۆكێ ماجد سەید سالح و شەمعون شلیمون ئیشۆ و د. داود ئەترووشی، سەرۆكێ زانكۆیا دهۆكێ و فەهیم عەبدوللا، سەرۆكێ جڤاتا پارێزگەهێ و سەرۆكێن هەژمارەكا زانكۆ و پەیمانگەهێن حكومی و تایبەت و هەژمارەكا مامۆستا و رێكخراوێن بیانی و رێڤەبەرێن دام و دەزگەهێن حكومی دوهی 26/2/2023 ل هولا كۆنفراسێن زانكۆیا دهۆك و ل ژێر درووشمێ «بەرەڤ كارتێكرنەكا باشترا جڤاكی و ئابووری» و ب مەرەما بهێزتركرنا هەڤكاریێ و كاراكرنا رۆل و پشكداریا لایەنێن دەرڤەی زانكۆیێ، وەكو سازیێن كەرتێ گشتی و كەرتێ تایبەت و رێكخراوێن جڤاكێ مەدەنی و سەندیكا و رێكخراوێن پیشەیی، كۆڕبەندێ «ئەركێ سێیەمێ زانكۆیا دهۆك و كارتێكرنێن جڤاكی٢٠٢٣ێ» هاتە گێڕان.
د كۆڕبەندی دا دو پانێل ل دۆر هەردو بابەتێن «دێ چاوا لایەنێن خوەدان بەڕژەوەندی رۆلێ خوە د پێشڤەبرنا زانكۆیێ دا گێڕن و راهێنان و مفایێن وێ بۆ خوەدان كاران» هاتنە پێشكێشكرن و ئارمانج ژ كۆڕبەندی گرنگیا لایەنێن خوەدان بەڕژەوەندی و پشكداریا وان بوو د ناڤ زانكۆیا دهۆك دا، هەروەسا ئەنجامدانا دانوستاندنان ل دۆر راهێنانا قوتابیان و كێشە و رێگری، پێشڤەچوون و مفایێن وێ بۆ خوەدان كاران و چەند بابەتێن گرێدای رۆلێ زانكۆیان هاتنە گەنگەشەكرن.
