كچەكا رەڤاندیا ئێزدی ژ ئەنجامێ بیڤەلەرزا رۆژئاڤا هاتە دیتن
ئەڤرۆ
دهۆك، لەزگین جوقی
كچەكا رەڤاندیا ئێزدی ب ناڤێ (زێری خەلەف) ل رۆژئاڤایێ كوردستانێ ژ ئەگەرێ ئەرد هەژا باكور و رۆژئاڤایێ كوردستانێ هاتە دیتن و كەس و كارێن وێ داخوازێ دكەن بهێتە رزگاركرن.
خەلیل خەلەف، برایێ وێ كچا رەڤاندییا ئێزدی بۆ رۆژناما ئەڤرۆ دیار كر:” ل سالا 2014ێ دەمێ تیرۆرستێن داعش هێرشی سەر شنگال كری، خوشكا وێ ب ناڤێ ( زێری خەلەف) دگەل زارۆیێن خۆ هاتە دەستەسەركرن و رەڤاندن ژلایێ هوڤانێن داعش ڤە، هەتا نوكە چارەنڤیسێ وێ نەهاتبوو دیتن، دەمێ ئەردهەژ ل رۆژئاڤایێ كوردستانێ چێبوویێ، خەلك ژ مالێن خۆ دەركەڤتن، خوشكا مە ژی هاتیە دیتن، لێ هێشتا نەهاتیە رزگاركرن”.
ئاشكەرا كر، دەمێ خەلك ژبەر ئەردهەژا باكور و رۆژئاڤایێ كوردستانێ ژ مالێن خۆ دەركەڤتین، خۆشكا مە ژی دناڤ خەلكی دا دەركەڤتیە و ل سەر شاشێن تەلەفزیونی مە خۆشكا خۆ دیت، ئێكسەر مە ناسكر، ئەم دەنگێ خۆ دگەهینینە هەموو لایەنێن پەیوەندیدار كاربكەن بۆ رزگاركرنا خۆشكا مە ل رۆژئاڤایێ كوردستانێ“.
زێدەتر گۆت: ل سالا 2014ێ ل گوندێ حەردان ب سەر شنگال ڤە، خۆشكا مە دگەل زارۆیێن خۆ هاتبوو رەڤاندن و هەتا نوكە دوو زارۆكێن خۆشكا مە ژی د رەڤاندی نە، چارەنڤیسێ وان ژی دیار نینە و دوو زارۆك ژی رزگاربووینە، نوكە ل كەمپا كەبەرتوو ل سنۆری پارێزگەها دهۆكێ ئاكنجی نە، ئەو ئەرد هەژا چێبوویی بوویە ئەگەر ئەم خوشكا خۆ یا رەڤاندی ببینین، لێ هێشتا نەهاتیە رزگاركرن، ئەم هیڤدارین كار ل سەر رزگاركرنا خۆشكا مە بهێتە كرن”.
خەلیل خەلەف گۆت:” گەلەك جاران ئەم چارەنڤیسێ خۆشكا خۆ د گەریاین، لێ ژلایێ تیرۆرستێن داعش ڤە ژ عێراقێ بۆ سوریا هاتبوو ڤەگوهاستن، مە تشتەك ژ چارەنڤیسێ وی نەدزانی، ئەم بێ هیڤی ببووین، لێ نوكە هیڤیەكا مەزن بو خێزانا مە چێبوویە و خۆشكا مە ب ساخی هاتیە دیتن ل رۆژئاڤایێ كوردستانێ، وەسا دیارە خیزانێن داعش ناڤ مالێن خۆ دا ڤەشارتینە، لەورا نەشیایە خۆ رزگاربكەت و گەلەك رەڤاندیێن دی یێن ئیزدی ماینە دناڤ خێزانێن داعش دا، ئەم هیڤدارین هەڤكاریا ئێزدیان بهێتە كرن و رەڤاندی بهێنە رزگاركرن”.
ل 2014ێ ل شنگال پتر ژ شەش هزار و417 كچ و ژن و زارۆكێن ئێزدیان ژلایێ رێكخراوا تیرۆرستێن داعش ڤە هاتنە رەڤاندن و بێ سەروشینكرن، ب هەڤكاری و پشتەڤانیا نڤیسینگەها رزگاركرنا رەڤاندیێن ئێزدی هەتا نوكە پتر ژ سێ هزار و 500 كەسان ژ هەردوو رەگەزان رزگاربووینە و هێشتا چارەنڤیسێ گەلەك رەڤاندیێن ئێزدی یێ دیارنینە بەردەوام كار بۆ رزگاركرنا رەڤاندیێن ئێزدی دهێتە كرن.
