70 قوتابیێن ئێكێ ل ئامێدیێ هاتنە خەلاتكرن
ئەڤرۆ
ئامێدیێ، مەحمود نهێلی:
ل ژێر چاڤدێریا بەرەڤان حەمدی بەرپرسێ لقێ ١٨ یێ پارتی دیموكراتی كوردستان و ب بەرهەڤبوونا هەژمارەكا مامۆستا و رێڤەبەرێن میری و كادرێن حزبی، كەسوكارێن قوتابیان و ب هەلكەفتا بۆرینا 70ێ سالان ل سەر دامەزرادنا ئێكەتیا قوتابیێن كوردستانێ، لقێ ئامێدیێ یێ ئێكەتیا قوتابیێن كوردستانێ 70ێ قوتابی یێن ئێكێ خەلاتكرن.
بەیار عوبەید، بەرپرسێ لقێ ئامێدیێ یێ ئێكەتیا قوتابیێن كوردستانێ بۆ ئەڤرۆ دیار كر، ئەو حەفتێ قوتابیێن نمرێن وان بلند ل سەر ئاستێ پۆلا 12 ئامادەیی یێن ١٩ قوتابخانێن سنوورێ پەروەردا ئامێدیێ هاتنە خەلاتكرن و گۆت: «مە ب هەڤكاری ل گەل رێڤەبەریا پەروەردا ئامێدیێ و ب هەلكەفتا بۆرینا 70ێ سالان ل سەر دامەزراندنا ئێكەتیا قوتابیێن كوردستانێ ئەو قوتابیە خەلاتكرن».
وەجیه سەعید، رێڤەبەرێ پەروەردا ئامێدیێ بۆ ئەڤرۆ خویا كر، ئەڤ جۆرە چالاكیە دبنە ئەگەر قوتابی پتر بزاڤا بكەن نمرێن بلندتر ب دەستخوە ڤە بینن و گۆت: «ل سالا بۆری هەژمارەكا زۆرا قوتابیێن مە نمرێن باش ب دەستخوە ڤە ئینابوون و ل كۆلیژێن باش هاتینە وەرگرتن و ئەڤ سالە ژی پشتەڤانیا حوكمەتێ بۆ كەرتێ پەروەردێ پترە و ئاستێ زانستی باشترە و ئەم د وێ باوەریێ داینە ئەڤ سالە رێژەكا پتر یا قوتابیێن دەڤەرا مە ل كۆلیژێن باش بهێنە وەرگرتن».
