مووچە بۆ تەخەكا جڤاكی دێ هێتە مەزاختن
ئەڤرۆ
دهۆك، نەوزاد هلۆری:
وەزارەتا كۆچ و كۆچبەر و كار و كاروبارێن جڤاكی یا ئیراقێ ب رێیا رێڤەبەریا كۆچ وكۆچبەر و بەرسڤدانا قەیرانان ل پارێزگەها دهۆكێ، دەست ب پرۆسا تۆماركرنا ناڤێن وان كەسان كر، كو رەوشا دارایی یا وان نەباشە ژ رەگەزێ مێ، ب تایبەت د ناڤ كەمپێن ئاوارەیان دا.
ئیسماعیل ئیسلام، بەرپرسێ هۆبا كۆچبەران ل رێڤەبەریا كۆچ و كۆچبەر و بەرسڤدانا قەیرانان ل پارێزگەها دهۆكێ د كۆنگرەیەكێ رۆژنامەڤانی دا دیار كر، ب بڕیارا حوكمەتا ئیراقێ مووچە بۆ وان ئاوارەیان دێ هێتە دابینكرن، كو رەوشا وان نەباشە و گۆت: (نوكە بڕیار چوویە د وارێ بجهئینانێ دا و ل هەر ئێك ژ كەمپێن كەبەرتۆ ئێك و كەبەرتۆ دوو، شاریا و شێخان، هەتا نوكە ناڤێن 16 هزار كەسان ب رێیا فۆرمەكا ئەلیكترۆنی هاتینە تۆماركرن، ئەڤ بەرنامە ژی ب رێیا هەردو وەزارەتێن كۆچ و كۆچبەران و كار و كاروبارێن جڤاكی دهێتە كرن، پشتی داوی هاتنا وان كەمپێن ناڤێن وان ل سەری دێ ل كەمپێن دی ژی دەست پێ كەین).
زێدەتر گۆت: (ئەو ئاوارێن رەوشا وان نەباش دێ بخوەڤە گریت، د ناڤ وان ژی دا ژنێن بەردایی، یان كچێن قەیرە و وان كچ و ژنێن ب تنێ دژین، یان ژی ئافرەتێن دانعەمر و وان ژی یێن چو كەسوكارێن خوە نەیی، ئەڤ یەك ژی پێنگاڤەكا باشە و بەرنامە ل سالێن بهێن ژی دێ یێ بەردەوام بیت).
