گۆرستانەك ل بن بەنداڤا مووسلێ دەركەفتیە
ئەڤرۆ
دهۆك، لەزگین جوقی:
رێڤەبەرێ شوونواران و كەلەپووری ل پارێزگەها دهۆكێ دیار كر، پشتی نزمبوونا ئاستێ ئاڤێ د بەنداڤا مووسلێ دا، مەزارگەه و گۆرستانەك، كو یێن ئۆلا ئێزدیانە ژ بن ئاڤێ دەركەفتینە و دبێژیت: ئەو مەزارگەه و گۆرستانە د نوونە و ئەم دێ ڤەدیتنەكێ ل سەر كەین.
د. بێكەس بریفكانی، رێڤەبەرێ شوونواران و كەلەپووری ل پارێزگەها دهۆكێ بۆ ئەڤرۆ خویا كر، ئەو گۆرستانا ژ بن ئاڤا بەنداڤا مووسلێ دەركەفتی یا ئۆلا ئێزدیانە و یا نوویە و گۆت: «دەمێ ل سالا 1985ێ بەنداڤا مووسلێ هاتیە چێكرن ئەڤ گۆرستانە ل گەل چەند گوند و مەزارگەهێن ئێزدیان بن ئاڤبووینە، نوكە تیمەكا رێڤەبەریا شونواران و كەلەپووری ل دەڤەرا ناحیا خانكێ كار ل سەر وێ گۆرستانێ دكەت».
شوكری رەشید، ئێك ژ ئاكنجێن ناحیا خانكێ و خەلكێ وێ دەڤەرێ یە یا گۆرستان لێ دیاربووی بۆ ئەڤرۆ گۆت: «ئەو گۆرستانا ل ناحیا خانكێ ژ بن بەنداڤا مووسلێ دەركەفتی یا مریێن ئێزدیانە و میژوویا وێ گەلەكا كەڤنە».
شوكری گۆتژی: «ل سالا 1985 مەزارگەهەكێ ئێزدیان ل گەل چەند گوندێن ئێزدیان كەفتنە بەر بەنداڤا مووسلێ و بن ئاڤبوون، نوكە ئاڤا بەنداڤێ كێمبوویە، لەو ئەو گۆرستانە دەركەفتیە، سالانە ئێزدیان تەوافا مەزارگەهێ بازید دكرن، خەلك ژ خانكا كەڤن دهاتنە تەوافا مەزارگەهێ بازید».
