ژن ژینگەهەكا بەردەوامە بۆ ژیانێ
ئەڤرۆ
دلڤین رەشید:
چالاكڤانەكا بوارێ ژینگەهێ بۆ روژناما ئەڤرۆ دیار كر، ژینگەها مرۆڤی یا ئێكێ ئەوە دەمێ زارۆك د رەحمێ دایكەكێ دا و هەر ژنەك ژی دبیتە لایەنێ بەردەوامبوونێ بۆ هەر بونەوەرەكی، ئانكو ژن دبیتە ژینگەها بەردەوامی دان ب ژیانێ، ئەڤجا ئەو ژیان د چ ژینگەه دا بیت.
چیان مەهدی چالاكڤان د بیاڤێ ژینگەهێ دا دیار كر كو ئەڤە چەندە دمینیتە سەر كۆمەكا فاكتەرێن جۆرا و جۆر وەك ئابوری و سیاسی و رەشنبیری و كەلتوری و دەروونی و جڤاكی و مێژوویی و جوگرافی و گۆت: (چونكی ئاستێ پێگەهاندنێ د هەر بوارەكی دا ل هەر وەلاتەكی جوداهیا خوە هەیە ل سەر ئاستێ پەروەردا تاكی).
چیانێ ئەو چەندە ژی دیار كر كو زانستێ ژینگەهێ بتنێ پاراستنا ژینگەها كەش و هەوا ب خوەڤە ناگریت، بەلكو مافێ مرۆڤی ئێك ژ رەهەندێن گەلەك سەرەكی و گرنگە د پاراستنا ڤی بواری دا.
چیان مەهدی گۆتژی: (هەروەسا تەكەزی كرن ل سەر مافێ ژنێ و ئەو پێگەهێ ژن تێدا دهێتە بەرچاڤكرن، كا ئەو ژن د چ ئاستێ رەوشنبیری دایە ژبۆ پەروەردەكرنا زارۆكێ خوە د پاراستنا ژینگەهێ دا، چونكی مەترسیا پیسبونا ژینگەهێ د قوناغا نوكە دا ل سەر ژیانا مرۆڤایەتی گەلەكە، ئەڤجا دڤێت ئەو هشیاری ڤێ چەندێ بیت).
چالاكڤانا ژینگەهێ دیار كر ژی، ئێك ژ بنەمایێن گرنك د پاراستنا ژینگەهێ دا پاراستنا ئاڤێ یە و ژنێ رولەكێ گرنگ هەیە د ڤی بواری دا، چونكی نەبوونا ئاڤێ د مالێ دا ژینگەها ژنێ تێك دددەت، ژبەركو پتریا كاروبارێن ناڤمالێ ئەركێ ژنێ نە و گۆت: (لەوا گرنگە گەلەك ئاڤێ ب هەروە نە مەزێخیت، چونكی ژن دایكە و زارۆك ل سەر دەستێ وێ دهێنە پەروەردەكرن).
چیانێ د بەردەوامیا ئاخفتنا خوە دا گۆت: (داخوازێ ژ هەموو لایەنێنن پەیوەندیدار دكەم گرنگیێ ب بابەتێ ژینگەهێ بدەن ب تایبەتی دایك هەر ژ بچۆكاتی زارۆكێن خوە فێری پاراستنا ژینگەهێ بكەن).