سەرۆك باژێرڤانیەك: ئەو زەرفێن مە ددانە خەلكی بۆ خۆ دبرنە مال
ئەڤرۆ
ئەمیر ئەترووشی
بەری سەیرانیێن نەوروزێ یێن ئەڤ سالە قەستا سەیرانێن نەوروزێ بكەن، ژینگەها پارێزگەها دهۆكێ ب تێكدا یا پیس بوو و هەموو ببوو گلێش و گلێشێ ئەڤ سالە ژی چوویە سەر و خەلكی ب رێژەیەكا گەلەك كێم جهێن خوە پاقژ دكرن و بەرمایكێن خوە رادكرن. سەرۆكێ باژێرڤانیا دینارتێ ژی رادگەهینیت كو هوسا دیار بوویە ئەو زەرفێن مە ددانە خەلكی بۆ خوە دبرنە مال، چونكو سنوورێ باژێرڤانیا وان تێكدا پیس بوویە و خەلكی گلێش هاڤێتیە بەر لێڤێن جادا و د زەرفان دا نەبوویە.
وارشین مزوری، ئێك ژ سەیرانیێن نەوروزا ئەڤ سالە بۆ ئەڤرۆ دیار كر، دەمێ مە ل رۆژا ئێك یا نەوروزێ قەستا گوندێ گەرماڤا كری بۆ سەیرانێ، ب راستی ژینگەها وی گوندی ب تمامی هاتبوو تێكدان و ب تێكدا گلێش بوو، ژ بەر بێهنا و پیساتیا ئاقارێ گوندی مە چو خوشی ب خۆ نەدیت، ئەڤە ژی لایەك و لایەكێ دی ئەو بوو كو ئەو سەیرانیێن دهاتنە وی جهی دیسا زێدەتر ژینگەها دەڤەرێ پیس دكر و پتریا وان گلێش ل گەل خوە نەدبر و هەر دهاڤێتە سەر وی گلێشێ كەڤن.
رێڤەبەریا گشتیا باژێرڤانیان ب رێیا هەر 46 باژێرڤانیێن ب سەر رێڤەبەریا گشتی ڤە رۆژانە ل رۆژێن نەوروزێ سێ كاران بۆ سەیرانیان دكەن.
ئەندازیار دیار بەحری رەسول، رێڤەبەرێ گشتیێ باژێرڤانیان ل پارێزگەها دهۆكێ دیار كر كو ل دەمێ نەوروزێ دا، باژێرڤانیێن وان سێ چالاكیان بۆ سەیرانیان دكەرن، ژ وان ژی، هەر باژێرڤانیەك ل سنوورێ خوە كیسێن گلێشی بەلاڤ دكەت و تیمێن باژێرڤانیان ل سەرێ رێكان د راوەستن و كیسێن گلێشی ددەنە ترومبێلان، بۆ هندێ ل دەمێ ژ سەیرانا خوە ب دووماهی دهێن گلێشێ خوە بكەنە د وی جهی دا.
زێدەتر دبێژیت: هەروەسا ل سنوورێ هەر باژێرڤانیەكێ جهەكێ تایبەت هاتبوو دەستنیشانكرن بۆ هندێ دەمێ سەیرانی ژ گەشتا خوە ڤەدگەرن گلێشێ خوە ل گەل خوە بینن و ل وی جهێ دەستنیشانكری یێ گلێشی بدانن.
ل دور كارێ سیێ یێ باژێرڤانیان د رۆژانێن نەوروزێ دا گۆت: پۆستەر ژ لایێ تیمێن باژێرڤانیان ڤە ل هەموو جهێن سەیرانیان دهێنە دابەشكرن بۆ هندێ ژینگەهـ بهێتە پاراستن.
بۆ زانین ئەڤ كارە هەموو ب هەڤكاری ل گەل كۆمپانیێن راكرنا گلێشی ل سنوورێ رێڤەبەریا گشتی یا باژێرڤانیان دهێتە كرن.
نازم محەمەد، سەرۆكێ باژێرڤانیا دینارتێ بۆ ئەڤرۆ دیار كر، ل رۆژانێن نەوروزێ وان ب هەڤكاری ل گەل كۆمپانیا MRF هژمارەكا زۆر یا زەرفێن گلێشی ل سەر سەیرانیێن نەوروزێ بەلاڤكرن، بۆ هندێ گلێشی ل گەل خوە بینن و ل وی جهێ هاتیە دەستنیشانكرن بهێتە دانان، لێ ب مخابنیڤە هەر وەكو پتریا خەلكی ئەو زەرفێن گلێشی بۆ خوە برینە مال و گلێشێ خوە ل وی جهی هێلاینە و هندەكان ژی هاڤێژتینە لێڤێن جادا.
سەرۆكێ باژێرڤانیا دینارتێ زێدەتر گۆت: ئەڤە دوو رۆژە ئەم نەچاربووینە هەوەكێ بۆ راكرنا گلێشێ سەیرانیێن نەوروزێ دانین و پتریا جهان هاتنە پاقژكرن، ب تایبەت بەر لێڤێن جادێن سەرەكی.
بلند رزا، سەرۆكێ باژێرڤانیا ئاكرێ بۆ ئەڤرۆ دیار كر، تیمێن ژینگەپارێزێن سەروكاتیا باژێرڤانیا ئاكرێ ب هەماهەنگی و هەڤكاریا كومپانیا MRF ل سنوورێ باژێرڤانیا ئاكرێ ل ڤان دوو رۆژان هەوەكا بەرڤرەها پاقژكرنێ برێڤەچوو كو د ڤێ هەوێ دا پاشماوێ گەشتیاران هاتە هەلگرتن و پتر ژ 105 تەنێن پاشماوەیان هاتنە راكرن، تێزانین ل رۆژا هەلكرنا ئاگرێ نەوروزێ ل گوری ئامارا رێڤەبەریا گەشت و گوزارا ئاكرێ پتری 100 هزار گەشتیاران قەستا ئاكرێ كربوو.
دهێتە زانین ژی كو ب سەدەما پیسبوونا ژینگەهێ، سالانە حەفت ملیۆن كەس د مرن. چونكو پلاستیك 100 سال دڤێن هەتا دناڤا ژینگەهێ دا ب حەلیێت، ئەرێ هەر كەسەك د رۆژێ دا چەند بوتلێن پلاستیكی د هاڤێژیت، هزربكە مرۆڤ یێ خرابیێ دگەهینیە 100 سالێن دی كو هێشتا نەگەهشتیێ و زەحمەت بگەهیتێ ژی. ئەلەمنیومی 200 سال دڤێن هەتا ب حەلیێت، هزربكە ڤان 200 سالا دێ چ ب سەرێ ژینگەهێ ئینیت. هەروەسا شیشەی ب هزارا سال دڤێن هەتا ژ ناڤ بچیت، هشیاربە و نەهاڤێژە دناڤ ژینگەهێ دا.
