كۆمپانیێن بیانی دخوازن كارێن بازرگانی ل هەرێمێ ئەنجام بدەن
ئەڤرۆ
هەولێر، قائید میرۆ:
هەژمارەكا زۆرا كۆمپانیێن بیانی دخوازن بهێنە هەرێما كوردستانێ بۆ كاركرنێ ل كەرتێ بازرگانی و بەرپرسێ راگەهاندنا ژوورا بازرگانی و پیشەسازیا هەرێما كوردستانێ ژی دبێژیت: رێككەفتنا د ناڤبەرا هەرێم و بەغدایێ دا دێ گەلەك كاریگەری ل سەر بازاڕی و كەرتێ بازرگانی هەبیت.
كاروان سورچی، بەرپرسێ راگەهاندنا ژوورا بازرگانی و پیشەسازی بۆ رۆژناما ئەڤرۆ گۆت: «رێككەفتنا د ناڤبەرا هەرێما كوردستانێ و بەغدایێ دا دێ كاریگەری ل سەر بازاڕێ هەرێما كوردستانێ هەبیت، ب تایبەتی پشتی پەسەندكرنا پڕۆژەقانوونا بودجەیێ و پشكا هەرێما كوردستانێ دێ هێتە دیاركرن و پارەیەكێ زۆر دێ كەڤیتە د بازاڕی دا ئەڤە ژی دێ بیتە ئەگەرێ زێدەبوونا لڤینێن بازرگانی و ئەو بازاڕێن هەتا نوكە سستی پێڤە دیار، وەكی: بازاڕێ ئەرد و خانیان و بازاڕێ تڕۆمبێلان دێ بەر ب باشبوونێ ڤە چن».
كاروان سورچی گۆتژی: «ڤێ دوماهیێ هاتنا كۆمپانیێن بیانی بۆ هەرێما كوردستانێ زێدەبوویە و هەژمارەكا بەرچاڤ یا كۆمپانیێن بیانی دخوازن بهێنە هەرێما كوردستانێ ب مەرەما ئەنجامدانا كارێن بازرگانی، ل گورەی ئامارێن بەردەست ل هەرێما كوردستانێ هەژمارا كۆمپانیێن بیانی ژ دەڤەرێن ناڤەڕاست و باشوورێ ئیراقێ زێدەترن، ئەڤە ژی بۆ رەوشا سەقامگیریا هەرێما كوردستانێ ڤەدگەڕیت».
