ب گوژمێ 30 ملیار دیناران پڕۆژە ل دهۆكێ دێ هێنە ئەنجامدان
دهۆك، لەزگین جوقی:
دەڤەردارێ دهۆكێ دیار كر، پلان هاتیە دانان ئەڤ سالە ل سنوورێ پارێزگەها دهۆكێ ب گوژمێ 30 ملیار دیناران پڕۆژەیێن خزمەتگوزاری بهێنە ئەنجامدان.
جەهوەر عەلی عەزیز، دەڤەردارێ دهۆكێ بۆ رۆژناما ئەڤرۆ دیار كر، د بەردەوامیا ئەنجامدانا پڕۆژەیێن خزمەتگوزاری دا ل پارێزگەها دهۆكێ، ئەڤ سالە ژی پلانەكا گەلەك باش هاتیە دانان ل گەل هەموو دام و دەزگەهێن خزمەتگوزاری و ئیدارێن سەر ب دهۆكێ ڤە و هەژمارەكا زۆر یا پڕۆژەیان یێن هاتینە پیشنیازكرن، ژ وانا ژی: چێكرنا جادەیان و سولینان و پڕۆژەیێن كارەبێ و ئاڤێ و پەروەردێ و ساخلەمیێ و گۆت: «ئەڤ سالە پلان هەیە هەموو جادە بهێنە چێكرن، نوكە دەست ب كاری هاتیە كرن، گرنگیەكا مەزن ب چێكرنا جادەیان هاتیەدان، هەروەسا ئەو تەسەیێن كەفتینە د جادەیان ژی دا دێ هێنە چێكرن».
ناڤهاتی ئاشكرا ژی كر، وان ئەڤ سالە پیشنیازكریە ب گوژمێ 30 ملیار دیناران پڕۆژە بهێنە ئەنجامدان، دبیت ئەڤ گوژمە زێدەتر ژی لێ بهێت و دبیت كێمتر ژی بیت و گۆت: «نوكە ئەم چاڤەرێی رازیبوونا لایەنێن پەیوەندیدار دكەین، داكو پتر پڕۆژە ل دهۆكێ بهێنە ئەنجامدان».
گۆتژی: «نوكە گەلەك پڕۆژە ل سنوورێ پارێزگەها دهۆكێ د وارێ بجهئینانێ دانە و بەری چەند رۆژان ژی بەرێ بنیاتی بۆ هندەك پڕۆژەیان هاتیە دانان و كاروانێ ئاڤەدانیێ ژی یێ بەردەوامە».
