د. پشتیوان سادق ل گەل تەخ و توێژێن جودا یێن دەڤەرا ئامێدیێ كۆمبوو
ئامێدیێ، مەحمود نهێلی:
د. پشتیوان سادق، بەرپرسێ مەكتەبا رێكخستنا پارتی ل بەهدینان و ب ئامادەبوونا سەباح بەیتوللا، جێگرێ بەرپرسێ مەكتەبێ و بەرەڤان حەمدی، بەرپرسێ لقێ 18 یێ پارتی و وارشین سەلمان، دەڤەردارێ ئامێدیێ، ل گەل رێڤەبەرێن قوتابخانان و زانایێن ئایینی و رێڤەبەرێن فەرمانگەهان و كادر و ئەندامێن حزبی و ئێكەتیێن قوتابی و لاوێن سنوورێ دەڤەرا ئامێدیێ كۆمبوونێن جودا جودا ئەنجامدان.
د كۆمبوونەكێ دا ل گەل مامۆستایێن ئایینی د. پشتیوان سادق سوپاسیا مامۆستایێن ئایینی كر بۆ ڕۆلێ وان یێ كارا ل شیرەتكرن و رێنمایێن ئایینی و گۆتارێن میانڕەو و ئاراستەكرنا وەلاتیان و بەحس ل رۆلێ زانایێن ئایینی د سەركردایەتیا شۆڕەش و سەرهلدانێن گەلێ مە دا كر، مینا شێخ سەعیدێ پیران و شێخ عەبدولسەلام بارزانی و مەلا مستەفا بارزانی.
دیسا د ڤان كۆمبوونان دا پشتیوان سادق، بەحس ل رەوشا كوردستانێ كر كو د هەموو بیاڤان دا گەلەك ژ دەڤەرێن دی یێن ئیراقێ پێشكەفتیترە.
هەروەسا ئاماژە ب وان گوهۆڕینان كر یێن نها ل دەڤەرێ دهێنە ئەنجامدان و دوپاتی ل سەر خزمەتكرنا وەلاتیان د هەموو بیاڤان دا كر.
هەر د چارچوڤێ سەرەدانا خوە دا بۆ دەڤەرا ئامێدیێ و ب چاڤدێری و ئامادەبوونا د. پشتیوان سادق، ئەندامێ مەكتەبا سیاسی و بەرپرسێ مەكتەبا رێكخستنا پارتی ل بەهدینان، ناڤەندا بالا یا ئامێدیێ یا ئێكەتیا لاوێن دیموكراتا كوردستانێ رابوو ب بەلاڤكرنا جلكێن وەرزشی ل سەر 200 تیمێن تەپا پێی ل سنوورێ دەڤەرا ئامێدیێ، ل دانێ ئێڤاری ژی شاندێ ناڤهاتی ل گەل پێشمەرگەیێن قارەمان ئێڤارە فتارەك ل چیایێ مەتینی كرن.
