د. پشتیوان سادق ل گەل نڤیسەر و رۆژنامەڤان و هونەرمەند و رەوشەنبیران كۆمبوو
ئەڤرۆ
ئەڤرۆ، رێوار محەمەد:
د. پشتیوان سادق، ئەندامێ مەكتەبا سیاسی و بەرپرسێ مەكتەبا رێكخستنا پارتی ل پارێزگەها دهۆكێ دوهی ئێڤاری 15/4/2023 دیدارەكا بەرفرەه ل گەل نڤیسەر و رۆژنامەڤان و هونەرمەند و رەوشەنبیران ئەنجام دا و سمینارەك ل دۆر رەوشا نوكە پێشكێش كر و گۆت: مە وەكو مللەتێ كورد خەباتەكا مەزن بۆ ئازادیا مللەتێ خوە كریە.
د. پشتیوان سادق، بەرپرسێ مەكتەبا رێكخستنا پارتی ل پارێزگەها دهۆكێ گۆت: «نڤیسەر و رۆژنامەڤان و هونەرمەند و رەوشەنبیر كاریگەرترین كەسن د ناڤ جڤاكی دا، لەو ئەز ئەڤرۆ گەلەكێ خوشحالم ل گەل هەوە كۆمبوویم».
ل دۆر هەلبژارتنێن سەندیكایان ژی د. پشتیوان سادق گۆت: «وەزارەتا ناڤخوە بەری دو حەفتیان بڕیار یا دای د دەمێ 80 رۆژان دا بەرهەڤی بۆ هەلبژارتنێن سەندیكایان بهێنە كرن، دیسا ل دۆر مافێ رەوشەنبیران ژی دێ پەیوەندیێ ب تیمێ وەزارەتا رەوشەنبیری كەم، كۆمەكا خالان هەیە هەماهەنگیەكا زێدەتر دێ ل گەل وەزارەتا روشنبیری دروست كەین، داكو مافێ هزری و بەرهەمێن هونەرمەندان و هەر مافەكێ دی بهێتە پاراستن و ب یاسایێ بهێنە بجهئینان».
د. پشتیوان سادق ئاشكرا ژی كر، گەلەك كەسان ناڤێ رۆژنامەڤانان دانایە سەر خوە و هیچ پێگیریەكێ ب ئەتەكێتێن كارێ رۆژنامەڤانیێ ناكەن و برینداركرنا هەستێن خەلكی ل نك وان بوویە كارەكێ ئاسایی و گۆت: «مە پێخوش نینە رێگری ل هیچ رۆژنامەڤانەكێ رەسەن بهێتەكرن بۆ گەهاندنا پەیاما خوە و نڤیسەر و رۆژناڤامانێ ڕاستەقی نەبیت هیچ كەسەك نەشێت دەستەسەر بكەت».
ل دۆر هونەری د. پشتیوان سادق د سمینارا خوە دا گۆت: «هونەر خودیكا هەمی خوشی و نەخوشیێن مللەتی یە و مرۆڤ نەشێت بێ هونەر بژیت، داخوازێ ژ سەندیكا رۆژنامەڤان و هونەرمەندان و ئێكەتیا نڤیسەران دكەم پڕۆژێن خوە پێشكێشی مە بكەن و یا د شیان دا بیت دێ بۆ وان هێتە كرن».
