گوهدار شێخۆ: بێ جوداهی خزمەتا هەموو توێژێن جڤاكی ل زاخۆ هاتیە كرن
ئەڤرۆ
زاخۆ، دلۆڤان هالۆ:
گۆهدار شێخۆ، سەرپەرشتێ ئیدارەیا سەربخوە یا زاخۆ، د كۆنگرەكێ رۆژنامەڤانی دا ڕاگەهاند، حوكمەتا هەرێما كوردستانێ ب سەرۆكاتیا مەسرور بارزانی، بێ جوداهی خزمەتا هەموو توێژێن جڤاكی كریە و ئاڤەدانی و خزمەتگوزاری پێشكێش كرینە.
سەرپەرشتێ ئیدارەیا سەربخوە یا زاخۆ ئاماژە ب وێ چەندێ ژی كر، ل دووڤ وێ پلان و بەرنامەیێ ژ لایێ ئیدارەیا سەربخوە یا زاخۆ ڤە د مەها رەمەزانێ دا هاتیە دانان، ئەو شیاینە ب هاریكاریا سەرمایەدارێن دەڤەرێ 30 خانی و شوقەیان ل سنوورێ ئیدارەیا سەربخوە یا زاخۆ پێشكێشی خەلكێ خوە یێ بێ داهات و خێزانێن شەهیدان و خێزانێن ئێتیمان بكەن، ل گەل پێشكێشكرنا سێ هزار و 500 سەبەتێن خوارنێ.
گۆهدار شێخۆ دیار كر ژی، زەكات ل سەر پتر ژ دو هزار خێزانان هاتیە بەلاڤكرن و قەرێن 53 خێزانێن پێدڤی یێن ماركێتان هاتینە دان، هەر ب هاریكاریا سەرمایەدارێن دەڤەرێ و گۆت: «ل مەها ڕەمەزانێ ئاهەنگێن ئایینی یێن شەڤانە ل پرا دەلال د هاتنە پێشكێشكرن، ڕۆژانە ل پاركا شەهیدان ژی فتارە بۆ 600 كەسان و توێژێن ڕەوشەنبیر و مامۆستایێن ئایینی و ڕۆژنامەڤان و هونەرمەندان دهاتە بەرهەڤكرن».
گۆتژی: «دەستپێشخەرییەكا باش ژ لایێ نۆشدار و پانزیخانە و ماركێتێن مەزن ڤە هاتە كرن و داشكاندنێن مەزن ئێخستنە سەر كارێن خوە بۆ وەلاتیان».
