شاندەكێ ناڤەندا خانی پشكدارییێ د كوڕبەندەكی دا ل فرەنسا دكەت
ئەڤرۆ
شاندەكێ ناڤەندا خانی یا رەوشەنبیری و راگەهاندنێ، كو پێكهاتبوو ژ ئیحسان ئامێدی، بەرپرسێ ناڤەندێ و پارێزەر كاروان هرۆری، ل رۆژا 22/4/2023 پشكداری د چالاكییەكێ دا ل دۆر جینۆسایدێ ل فرەنسا كر.
ئەو چالاكییە ژ لایێ رێكخراوا نێڤدەولەتی یا قوربانیێن جینوسایدا كورد ل فرەنسا (AMVGK) ب هەڤكاری دگەل ناڤەندا خانی یا رەوشەنبیری و راگەهاندنێ هاتیە رێكخستن و ل هولا كۆنفرانسان ل باژێڕڤانییا (مۆنتوبان ل فرەنسا) هاتە سازكرن.
چیا ئەمین، بەرپرسێ رێكخراوا نێڤدەولەتی یا قوربانیێن جینوسایدا كورد ل فرەنسا (AMVGK) بۆ ئەڤرۆ گۆت: «چەندین پەرلەمانتار و رەوشەنبیر و پارێزەرێن فرەنسی د ڤی كوۆبەندی دا پشكداربوون، دیسا دانوستاندنەكا باش ل سەر بابەتێ جینۆسایدێن كوردان ژ لایێ مێژوویی و قانوونی ڤە هاتە كرن».
ئێحسان ئامێدی، بەرپرسێ ناڤەندا خانی یا رەوشەنبیری و راگەهاندنێ د سمینارەكێ دا بەحسێ چەندین قووناغێن گرنگ یێن جینوسایدێن كوردان كر، ل داویێ ژی داخواز ژ ئامادەبوویێن فرەنسی كر، كو پشتەڤانیا ئەڤی پڕۆژەی بكەن، ل پاشەرۆژەكا نێزیك پەرلەمانێ فرەنسا دانپێدانێ ب جینوسایدێن كوردان دا بكەت.
ژ لایەكێ دی ڤە، سەرۆكێ فیدراسیۆنا كۆمەلەیێن كورد ل فرەنسا، شۆكری بەرواری دیار كر، ساخكرنا ڤان جۆرە بابەتان، گەلەكا گرنگە، ژ بۆ لڤینا هەستێ فرەنسیان و ئاگەهیا وان ل سەر رەوشا كوردان.
ل دووماهیێ پارێزەر كاروان هرۆری بەحسێ ئالیێ پراكتیكی یێ وان پێنگاڤێن هاتینە هاڤێتن كر، ژ بۆ قەرەبووكرنا زیاندارێن ئەنفالان، دیسا ئاماژە ب قانوونێن نێڤدەولەتی و ناڤخوەیی كر، ئەوێن كارتێكرن ل كەیسێن ئەنفالان كرین.
