وەبەرهێنەرێن بیانی دێ پڕۆژەیێن وەبەرهێنانێ ل كوردستانێ ئەنجام دەن
ئەڤرۆ
هەولێر، قائید میرۆ:
د چارچوڤێ پشكداریا شاندێ هەرێما كوردستانێ بۆ دامەزراندنا دەزگەهێ كلدانی ل ئەمریكا، نوونەرەكا كریستیان ل پەرلەمانێ كوردستانێ ئاشكرا كر، بڕیارە وەبەرهێنەرێن بیانی و دەزگەهێ كلدانی رۆلەكێ گرنگ هەبیت د كەرتێ وەبەرهێنانێ دا ل هەرێما كوردستانێ.
رۆبینا تیاری، نوونەرا كریستیان ل پەرلەمانێ كوردستانێ بۆ رۆژناما ئەڤرۆ دیار كر، شاندێ هەرێما كوردستانێ پشكداری د هەلكەفتا دامەزراندنا دەزگەهێ كلدانی ل ئەمریكا كریە و نێزیكی هزار كەسان ل سەر ئاستێ جیهانێ پشكداری تێدا هەبوویە و گۆت: «چەندین دیدار د كۆڕبەندی دا هاتنە ئەنجامدان، د چارچوڤێ سەرەدانا شاندێ هەرێما كوردستانێ بۆ ئەمریكا ب مەرەما پشكداریكرن د كۆڕبەندێ كلدانی دا ل ئەمریكا، چەندین دیدار و كۆمبوون ل گەل سیاسەتمەدار و بازرگانێن بیانی ئەنجامدان، كو تێدا رەوشا ئەڤرۆ یا هەرێما كوردستانێ هاتبوو بەحسكرن، بێگومان هەرێما كوردستانێ ئێكە ژ وان وەلاتێن جیهانێ یێن پشكداری ل دەزگەهێ كلدانی هەی».
رۆبینا تیاری گۆتژی: «دەزگەهێ كلدانی رۆلەكێ مەزن ل سەر ئاستێ جیهانێ هەیە و بڕیارە مەزنە بازرگان و وەبەرهێنەرێن بیانی بهێنە هەرێما كوردستانێ بۆ ئەنجامدانا وەبەرهێنانێ ل هەرێمێ، ئەڤە ژی پێنگاڤەكا گرنگە ئەم ب شێین وەبەرهێنەرێن جیهانێ بینینە كوردستانێ و رۆلێ وان ژی یێ كێم نابیت د ئاڤاكرنێ دا، لەوڕا ژی دەزگەهێ كلدانی دێ رۆلەكێ مەزن د ڤی بیاڤی دا هەبیت، دەزگەهێ كلدانی ئێكە ژ وان دەزگەهێن ل سەر ئاستێ ئەمریكا و جیهانێ پێگەهەكێ بهێز هەی».
