رۆژا جیهانی یا كرێكاران ل پارێزگەها دهۆكێ ب چەندین چالاكیان هاتە ساخكرن
ئەڤرۆ
ئەڤرۆ، مەحمود نهێلی:
ب هەلكەفتا 1ی ئەیارێ رۆژا جیهانی یا كرێكاران، چەندین چالاكی ل سەرانسەری پارێزگەها دهۆكێ هاتە ئەنجامدان و هەر ب هەمان هەلكەفت سەندیكا كرێكارێن كوردستانێ داخوازا راگرتنا ئینانا كرێكارێن بیانی بۆ ناڤ هەرێما كوردستانێ دكەت.
دكتۆر عەلی تەتەر، پارێزگەرێ دهۆكێ ب هەلكەفتا 1ی ئەیارێ رۆژا جیهانی یا كرێكاران راگەهاند، ب هەلكەفتا رۆژا جیهانیا كرێكاران، جوانترین پیرۆزباهیان ئاراستەی كرێكارێن هەرێما كوردستانێ و ب تایبەتی یێن پارێزگەها دهۆكێ دكەین، كار و خزمەتا كرێكاران د ئاڤەدانكرنا وەلاتی دا یا دیار و پێشچاڤە و ب ئومێدین كرێكار ب هەمی مافێن خوە شادببن و دوبارە ئەڤ رۆژە پیرۆزە.
دیسا هەر ب هەمان هەلكەفت سەندیكا كرێكارێن كوردستانی داخوازا راگرتنا ئینانا كرێكارێن بیانی دكەت و داخوازا بجهئینانا قانوونێن بەركار یێن هەرێما كوردستانێ ژی دكەت.
ژ لایەكێ دیڤە زەكیا سەید سالح، بریكارا وەزەراتا كار و كاروبارێن جڤاكی یا حوكمەتا هەرێما كوردستانێ دیار كر، نوكە 138 هزار كرێكار ژ لایێ حوكمەتێ ڤە هاتینە دەستەبەركرن و نابیت كۆمپانیێن بیانی پتر ژ 25% كریكارێن خوە بدەنە كاری.
ب هەلكەفتا 1ی ئەیارێ رۆژا جیهانیا كرێكاران ل سنوورێ دەڤەرداریا ئامێدیێ چەندین چالاكی هاتنە ئەنجامدان و سەرۆكاتییا باژێرڤانییا سەرسنكێ ژی هەژمارەكا كرێكاران خەلاتكرن.
ئەندازیار سەرجون، سەرۆكێ باژێرڤانییا سەرسنكێ بۆ رۆژناما ئەڤرۆ دیار كر، كرێكاران رۆلەكێ بەرچاڤ د ئاڤەدانكرنا وەلاتی و پاقژكرن و جوانكرنا سەر و سیمایێ باژێری و پاراستنا ژینگەهێ دا هەیە و گۆت: «ژ بەر رۆلێ وان یێ گرنگ و پیرۆز ئەم رابووینە ب خەلاتكرن و رێزگرتنێ ل ٣٥ كرێكاران ل سنوورێ باژێرڤانیا سەرسنكێ».
هەر ب هەلكەفتا رۆژا جیهانیا كرێكاران وەك نەریتەكێ سالانە هژمارەكا زۆرا خێزان و گەشتیاران قەستا بەرێ سیلێ كرن و چەندین چالاكی ل سەیرانگەها ناڤبری هاتنە كرن.
