نێزیكی 13 هزار سەیێن بێ خودان ل دهۆكێ هەنە
ئەڤرۆ
زاخۆ، عەلی حاجی:
دیاردەیا سەیێن بێ خودان دناڤا كولان و جادەیان رۆژ ب رۆژ بەرەڤ زێدەبۆنێ دچن و بوویە مەترسی ل سەر ژیانا خەلكی و هەتا نۆكە ژی حوكمەت و لایەنێن بەرپرس هیچ چارەسەریەك ژ بۆ ڤێ چەندێ نەدیتیە.
ئیسماعیل مستەفا، بەرپرسێ ڕاگەهاندنێ ل باژێرڤانیا دهۆكێ بۆ رۆژناما ئەڤرۆ گۆت: ل پارێزگەها دهۆكێ نێزیكی 13 هزار سەیێن بێ خودان هەنە و ل سەر كۆلان جادەیان دژین و گۆت: نۆكە پرۆژەك د دەستێ مە دایە ژ بۆ كۆمكرنا وان سەیان، ئەو ژی كێم مایە كۆ تمام ببیت و 4 دۆنم زەڤی ژ بۆ وێ پرۆژەی هاتینە تەرخان كرن ل سەر بودجەیا 323 ملیۆن دیناران و نها ب رێژەیا سەدێ 48 پرۆژە هاتیە بجهئینان، ئاشكرا ژی كر، ئارمانج ژ ڤی پرۆژێ كێمكرنا مەترسیا وان سەیانە ل سەر ژیانا وەلاتیان.
مەمەند محەمەد بۆ رۆژناما ئەڤرۆ گۆت: نێزیكی 20 هزار سەیێن بێ خودان ل پارێزگەها هەولێرێ هەنە و ئەڤ سەیە بووینە مەترسی ل سەر ژیانا خەلكی، د ماوێن بوریدا مە دیت كا چاوا هێرش كربونە سەر هژمارەكا زارۆك و وەلاتیان و هاتبونە برینداركرن ب شێوازەكێ زۆر خراپ و گۆت: دا كو بشێین چارەسەرییەكێ ژ بۆ ڤێ ئاریشێ ببینین، مە پرۆژەك بەردەست كریە كۆ بشێت وان سەیێن بێ خودان ل خو بگریت، ئەو ژی ب رێكا دروستكرنا شەلتەرەكی كۆ 20 دۆنم زەڤی ژ بۆ هاتیە تەرخان كرن.
هەر ئێك ژ پارێزگەها سلێمانی و كەركوك و قەزایا دەربەندیخانێ ژی بریارە شەلتەرێن تایبەت ب كۆمكرنا سەیان بهێتە دروستكرن، دا كو ئێدی ئەڤ سەیە نەبنە مەترسی ژ بۆ ژیانی وەلاتیان.
