لێبۆرینا گشتی بۆ ژنێن د ناڤا چاكسازیان دا دێ هێتە دەركرن
ئەڤرۆ
هەولێر، قائید میرۆ:
جێگرا سەرۆكێ لژنا مافێن مرۆڤی ل پەرلەمانێ ئیراقێ ئاشكرا كر، پڕۆژەیەك بۆ دەركرنا لێبۆرینا گشتی هاتیە بەرهەڤكرن و دبێژیت: ل دەستپێكێ لێبۆرین بۆ ژنان دێ هێتە دەركرن، ژ بەركو رەوشا وان وەك پێدڤی نینە.
جوان عەبدوللا، جێگرا سەرۆكێ لژنا مافێ مرۆڤی ل پەرلەمانێ ئیراقێ بۆ رۆژناما ئەڤرۆ دیار كر، لژنەیا مافێ مرۆڤی ل پەرلەمانێ ئیراقێ بەرهەڤیان دكەت ژ بۆی دەركرنا پڕۆژەقانوونا لێبۆرینا گشتی بۆ ژنێن زیندانكری، ژ بەركو رەوشا ژنێن د ناڤا زیندانێن ئیراقێ دا یا باش و وەكو پێدڤی نینە و گۆت: «وەزارەتا پەیوەندیدار ژی رازیبوویە بۆ دەركرنا لێبۆرینا گشتی بۆ ژنێن د ناڤا زیندانێن ئیراقێ دا».
جوان عەبدوللا گۆتژی: «بڕیارە پێداچوون د رەوشا ناڤا زیندانان دا بهێتە كرن و زیندان ل گورەی تاوانێن ل سەر هاتینە سزادان بهێنە جوداكرن، ژ ئەگەرێ خرابیا رەوشا ناڤا زیندانێن ئیراقێ زیندانی تووشی نەخۆشیان بووینە و هندەك زیندانیان ژی ژییێ وان گەهشتیە ئاستەكی پێدڤی ب لێبۆرینێ هەیە و ژییێ وان گەلەك مەزن بوویە و هێشتا د ناڤا زیندانان دا ماینە و دەمێ خوە تەمام نەكریە».
