دۆژمنه‌كێ نوو بۆ هێزێن كوردی ل رۆژئاڤا كوردستانێ په‌یدابوو
ئه‌ڤرۆ نیوز، ڤه‌ده‌ر ره‌شاڤایی:
دده‌مه‌كی دا هێزێن كوردی ل رۆژئاڤا كوردستانێ د پێشره‌ویێ دانه بتایبه‌ت ل پارێزگه‌ها حه‌سه‌كێ، گرۆپه‌كێ نوو هه‌بوونا خوه ل وێ ده‌ڤه‌رێ راگه‌هاند و دژایه‌تیا خوه بۆ كوردان دیاركر.
پشتی یه‌په‌گێ بهاریكاریا چه‌ند چه‌كداره‌كێن سریانی و هنده‌ك ئه‌ندامێن عه‌شیرێن ئه‌ره‌ب شیان چه‌ند ده‌ڤه‌ره‌كێن دبن ده‌ستێ داعش ده‌ربێخن ژ وان باژێرۆكێ تل حه‌میس و تل به‌راك ل پارێزگه‌ها حه‌سه‌كێ، رژێما سوری گرۆپه‌ك دامه‌زراند كو گه‌فان دكه‌ن هێرش بكه‌نه كوردان و دژی سیسته‌مێ كانتونێن كوردان ل سوریا بجه‌نگن.
ئه‌ڤ گرۆپه ژ ئالیێ رژێما سوریا ڤه هاتیه دانان و ناڤێ گرۆپێ (جه‌زیرا عه‌ره‌بیا سوریا) لێ دانایه،
د به‌یاننامه‌كێ دا ڤی گرۆپی خویاكریه كو ئه‌و ل حه‌سه‌كێ ده‌ستبكاربوونه بۆ پاراستنا ده‌ستهه‌لات و ناسناما عه‌ره‌بی یا پارێزگه‌ها حه‌سه‌كێ د چارچوڤێ ده‌ستهه‌لاتا رژێما سوریا كو كانتونا جزیرێ ل رۆژئاڤا كوردستانێ بخوه‌ڤه دگریت.
