د دو حەفتیان دا پتر ژ 30 جاران دەڤەرا ئامێدیێ هاتیە بوردۆمانكرن
ئەڤرۆ
ئامێدیێ، مەحمود نهێلی:
د دو حەفتیان دا گوندێن سنوورێ دەڤەرداریا ئامێدێ پتر ژ 30 جاران كەفتیە بەر هێڕشێن فڕۆكێن لەشكرێ توركیا و پتریا جاددێن دەڤەرا بەرێ گارێ ژی هاتینە ژناڤبرن.
ل دووڤ گۆتنێن ئاكنجیێن دەڤەرێ ئەڤە دو حەفتیە بوردۆمانا فڕۆكێن لەشكرێ توركیا بۆ سەر دەڤەرێ دژوار بوویە، ب تایبەتی ژی د ڤان سێ چار رۆژێن داویێ دا، كو رۆژانە پتر ژ 10 جاران گوندێن دەڤەرا ئامێدیێ ب تایبەتی ژی ل دەڤەرا نهێلێ دهێنە بوردۆمانكرن.
هەڤال بركاهینی، ئاكنجیێ گوندێ بلاڤە بۆ رۆژناما ئەڤرۆ دیار كر، چەندین رۆژە بەردەوام دەوروبەرێن گوندێ وان دهێنە بوردۆمانكرن و گۆت: «ژ ئەنجامێ ڤێ بوردۆمانێ زیان گەهشتینە خانی و رەز و بیستانێن مە».
وەلاتیەكی دی یێ خەلكێ دەڤەرا بەرێ گارێ بۆ رۆژناما ئەڤرۆ دیار كر، بەری چەند شەڤەكان فڕۆكێن توركیا جادا سەرەكی یا دچیتە بەرێ گارێ ل چەندین جهان بوردۆمانكریە و گۆت: «بوردۆمانا ڤێ دووماهیێ یا فڕۆكێن لەشكرێ توركیا زیان گەهاندیە جاددەیێ و پتریا وێ ژ ناڤبریە و ئەم نەشێین بچینە سەر گوندێن خوە».
