سالڤەگەڕا نڤیسەر و جڤاكناس (جەعفەر مایی) ل دهۆكێ هاتە ساخكرن
ئەڤرۆ، شاكر ئەتروشی:
دوهی ئێڤاری درێورسمەكێ ژ هەژی دا، سالڤەگەڕا ئێكێ یا وەغەركرنا پێشمەرگە و نڤیسەر و جڤاكناس (جەعفەر مایی) ل هولا ئێكەتیا نڤیسەرێن كورد/تایێ دهۆكێ هاتە ساخكرن و چار پرتووكێن وی ل سەر بەرهەڤبوویان هاتنە بەلاڤكرن.
مەحفۆز مایی، برایێ خودێ ژێ رازی جەعفەر مایی ب خواندنا پارچە هەلبەستەكێ دەست ب رێڤەبرنا وێ چالاكیێ كر و دیاركر كو ژ دەستدانا برایێ وان ڤالاهیەكا مەزن خستە ناڤ مالباتا وان و گۆت چو جاران جهێ وی ناهێتە پڕكرن.
دووفدا نڤیسەر ئیسماعیل بادی د پەنەلەكی دا دیاركر كو ل دووماهیا سالێن حەفتێیان ئەو ئێك ژخواندەڤانێن بەردەوامێن نڤیسینێن جەعفەر مایی و پشتی چەند سالان ل نێزیك ب دیتنا وی شادبوو هەتا گەهشتیە وی رادەی پێكڤە د چەند پرتووكەكان دا كاركرن و خواست پرۆژێ وی نۆبهارا جەعفەر مایی یێ بەردەوام بیت، پاشان نڤیسەر و رۆژنامەڤان (سەلام بالایی) بەحسێ وی دەمی كر دەمێ ئەو سەرنڤیسەرێ گۆڤارا سڤۆرە و دیاركر كو جەعفەر مایی سەردەوانا وان كربوو و پرۆژەكێ هەڤپشك دبۆارێ خزمەتكرنا ئەدەب و رەوشەنبیریا زارۆكان دا پێكڤە ئەنجام دابوو، پاشان مەدیاكارێ دێرین جەمال بەرواری چەند بیرهاتنێن خوە ل گەل جەعفەر مایی ڤەگێران و ئاماژە ب هندێ دا كو ل سالا 1979 جەعفەر و خوشك و برایێن خوە چەند پارچە زارڤەكرن ل مالا خوە تۆماردكرن و بۆ رادیۆیا كوردی ل بەغدا دهاتنە هنارتن و ئەوان زارڤەكرنا جەماوەرەكێ باش هەبوو، ل دووماهیێ ژی دیدارەكا جەعفەر مایی كو ژلایێ كەنالێ كوردستان (24) ل گەل هاتبووكرن هاتە نیشادان.
